Athugið þessi frétt er meira en mánaðargömul.

Flugfreyjur kolfelldu kjarasamning

08.07.2020 - 13:03
Mynd með færslu
 Mynd: Haukur Holm
Félagar í Flugfreyjufélagi Íslands felldu kjarasamning við Samtök atvinnulífsins fyrir hönd Icelandair. Samningar náðust 25. júní. Atkvæðagreiðsla hófst síðastliðinn fimmtudag og lauk klukkan tólf í dag. Næstum þrjár af hverjum fjórum greiddu atkvæði gegn samningnum. Flugfreyjufélagið segir að nú verði samningaviðræður hafnar sem fyrst en Icelandair segist skoða alla möguleika í stöðunni.

Kjörsókn var 85,3 prósent. 26,46 prósent greiddu atkvæði með kjarasamningi en 72,65 prósent gegn honum. 0,89 prósent skiluðu auðu. 

Í yfirlýsingu frá stjórn og samninganefnd Flugfreyjufélags Íslands segir að viðræður hefjist á ný svo fljótt sem auðið er. Þar er félagsmönnum þakkað fyrir samstöðu og stuðning. „Það að nýr kjarasamningur hafi verið felldur með afgerandi hætti sýnir vel að félagsmenn telja of langt gengið í þeim hagræðingarkröfum sem fólust í nýjum samningi. Stjórn og samninganefnd mun nú fara yfir málið og mæta á fund ríkissáttasemjara þegar til hans verður boðað með ríkan samningsvilja líkt og áður.“

Í yfirlýsingu frá Icelandair segir að félagið hyggist meta þá möguleika sem eru í stöðunni. Þar segir að samningurinn hafi stuðlað að auknum sveigjanleika á sama tíma og ráðstöfunartekjur flugfreyja og flugþjóna hafi verið varin. „Nú verðum við að skoða þá möguleika sem eru í stöðunni og munum gera það hratt og örugglega. Það hvílir mikil ábyrgð á okkur sem stjórna félaginu að tryggja rekstrargrundvöll þess til framtíðar og þar með verðmæti fyrir þjóðarbúið og mikilvæg störf, þar á meðal störf flugfreyja og flugþjóna.“  

Leiðrétt 13:45 Í upphaflegri gerð fréttarinnar sagði á einum stað að rúmlega þrjár af hverjum fórum hefðu greitt atkvæði gegn samningnum. Hið rétta er að tæplega þrjár af hverjum fjórum greiddu atkvæði gegn samningnum, eins og sást í tölum um skiptingu atkvæða.