Athugið þessi frétt er meira en 1 ára gömul.

Maður hjólaði yfir hringtorg og hafnaði á bíl

Mynd með færslu
Reykjanesbær. Mynd úr safni. Mynd:
Umferðaróhapp varð í umdæmi lögreglunnar á Suðurnesjum fyrr í vikunni þegar maður hjólaði yfir hringtorg og hafnaði á bifreið. Hann var fluttur á Heilbrigðisstofnun Suðurnesja til aðhlynningar.

Vaknaði grunur hjá lögreglu um að hann væri undir áhrifum fíkniefna og studdu niðurstöður sýnatöku þann grun því þær staðfestu neyslu hans á kannabis.
Þá óku tveir ökumenn á ljósastaur og umferðarljós. Annar þeirra hafði sofnað undir stýri.
Lögregla hafði einnig afskipti af tveimur drengjum sem voru saman á einni rafskútu ætlaðri einum. Hvorugur var með öryggishjálm. Lögregla hafði samband við forráðamenn þeirra og tilkynnti málið til barnaverndar.

Voru með þýfi úr fjórum verslunum

Tveir ofurölvi menn sem voru á vappinu með innkaupakerru úr Bónus fyrr í vikunni í Keflavík vöktu athygli vegfaranda sem gerði lögreglunni á Suðurnesjum viðvart. Í kerrunni reyndist vera mikið magn þýfis úr fjórum verslunum sem annar þeirra hafði tekið án þess að greiða fyrir.  Um var að ræða þráðlausan hátalara, ilmvötn og ýmis konar matvöru úr Bónus að heildarverðmæti tæplega 50 þúsund krónur.
Annar mannanna viðurkenndi þjófnaðinn við skýrslutöku hjá lögreglu.

Valgerður Árnadóttir
Fréttastofa RÚV