Athugið þessi frétt er meira en 10 mánaða gömul.

Nýr þjónustukjarni fyrir fatlaða á Akureyri

01.07.2020 - 16:11
Mynd með færslu
 Mynd: Akureyrarbær/Kristófer Knutsen
Nýr þjónustukjarni fyrir fatlað fólk var vígður við Klettaborg á Akureyri í dag. Þar verður nýtt heimili sex einstaklinga sem þurfa aðstoð við daglegar athafnir. Aðstaða íbúa og starfsfólks gjörbreytist til hins betra.

Halla Björk Reynisdóttir, forseti bæjarstjórnar Akureyrarbæjar, vígði þjónustukjarnann. „Þetta er sannarlega góður dagur og ánægjulegur. Ég vil óska íbúum, starfsfólki og okkur öllum til hamingju með glæsilegt heimili og langar jafnframt að þakka öllum þeim sem komu að verkinu,“ er haft eftir henni í frétt á vef Akureyrarbæjar.

Byggingin stendur á nýrri lóð á horni Klettaborgar og Dalsbrautar og er hátt í 600 fermetrar að stærð. Sex íbúðir eru í húsinu, en einnig sameiginleg rými, garður sem nýtist til samveru, og starfsmannaaðstaða.

Tilkoma þjónustukjarnans er liður í þeirri stefnu að leggja niður hefðbundin herbergjasambýli en veita þess í stað einstaklingsmiðaða þjónustu með áherslu á sjálfstæða búsetu. Hönnun húsnæðisins tekur mið af því og á að auka persónulegt svigrúm íbúa. Íbúarnir flytja inn á allra næstu dögum.

 

agusto's picture
Ágúst Ólafsson
Fréttastofa RÚV