Icelandair Group stefnir á hlutafjárútboð í ágúst

Mynd með færslu
 Mynd: Bjarni Rúnarsson - RÚV
Samningaviðræður Icelandair Group standa enn við lykilviðsemjendur, meðal annars flugvélaleigusala, vegna endurskipulagningar fyrirtækisins. Félagið hefur fengið jákvæð viðbrögð frá meginþorra kröfuhafa sem hafa lýst yfir vilja til að vinna með því í gegnum ferlið. Hlutafjárútboð hefst í ágúst ef tekst að ljúka samkomulagi í júlí.

Þetta kemur fram í tilkynningu sem Icelandair Group sendi Kauphöllinni í morgun. 

Þar segir að ef samningaviðræður bera ekki viðunandi árangur þurfi félagið að ljúka fjárhagslegri endurskipulagningu án aðkomu íslenskra stjórnvalda. Það gæti tekið allt að 12 mánuði og á meðan þyrfti félagið að fresta öllum greiðslum til fjármögnunaraðila.

Þá vinnur félagið nú með íslenskum stjórnvöldum, Íslandsbanka og Landsbankanum við útfærslu ríkisábyrgðar á láni. Lánafyrirgreiðsla íslenskra stjórnvalda verður þó meðal annars háð samkomulagi við kröfuhafa og að félagið nái markmiðum um öflun nýs hlutafjár, að því er segir í tilkynningunni.

Búast fljótlega við niðurstöðu í MAX-viðræðum

Icelandair Group á  enn í samningaviðræðum við Boeing um frekari bætur vegna kyrrsetningar MAX-vélanna og afhendingar véla sem enn eru útistandandi. Niðurstaða gæti fengist á næstu dögum haldi viðræðurnar áfram á uppbyggilegum nótum eins og segir í tilkynningunni.

Þá kemur fram í tilkynningunni að handbært fé Icelandair Group sé nú um 150 milljónir bandaríkjadala, tæplega 21 milljarður íslenskra króna, sem  er umfram þriggja mánaða rekstrarkostnað miðað við núverandi aðstæður.

Þar segir enn fremur að það sé mat Icelandair Group að fjárhagsleg endurskipulagning sem byggist á gagnkvæmum samningum við kröfuhafa sé ákjósanlegasta leið félagsins til að tryggja hagsmuni allra, þar með talið hluthafa, fjármögnunaraðila, birgja, viðskiptavina og starfsfólks.

 

 

annalth's picture
Anna Lilja Þórisdóttir
Síðast:
Þessi þáttur er í hlaðvarpi