Athugið þessi frétt er meira en 2 ára gömul.

Guðlaugur sá rautt og Sandra áfram í deild þeirra bestu

epa08484969 Darmstadt's Victor Palsson (L) in action during the German Bundesliga Second Division soccer match between SV Darmstadt 98 and Hannover 96 at Merck-Stadion in Darmstadt, Germany, 14 June 2020.  EPA-EFE/RONALD WITTEK / POOL CONDITIONS - ATTENTION: The DFL regulations prohibit any use of photographs as image sequences and/or quasi-video.
 Mynd: EPA

Guðlaugur sá rautt og Sandra áfram í deild þeirra bestu

28.06.2020 - 16:27
Lokaumferðin í bæði 2. deild karla í Þýskalandi og efstu deild kvenna fór fram í dag. Guðlaugur Victor Pálsson fékk að líta rauða spjaldið á meðan að lið Söndru Maríu Jessen hélt sér uppi á markatölu.

Lokaumferðin í 2. deild karla í þýskalandi fór fram í dag og var Guðlaugur Victor Pálsson í byrjunarliði Darmstadt sem mætti Stuttgart í lokaleik sínum. Fyrir leik var Stuttgart nær öruggt með sæti í efstu deild á næstu leiktíð og lið Darmstadt átti ekki lengur möguleika á því að fara upp um deild. Á 65. mínútu leiksins fékk Guðlaugur Victor gult spjald og aðeins nokkrum sekúndum síðar fékk hann sitt annað gula spjald og þar með rautt. Fékk hann seinna gula spjaldið fyrir hendi og virtist vera að um strangan dóm væri að ræða. Brottvísun hans kom þó ekki að sök en Darmstad vann leikinn með þremur mörkum gegn einu. Liðið endar í 5. sæti deildarinnar, þremur stigum frá umspilssæti. 

Lokaumferð efstu deildar kvenna fór einnig fram í dag og þar hefði Íslendingaviðureign getað átt sér stað þegar að Þýskalandsmeistarar Wolfsburg tóku á móti Bayer Leverkusen. Sara Björk Gunnarsdóttir var ekki í leikmannahópi Wolfsburg í dag en hún hefur þegar gefið það út að hún muni ekki spila með Wolfsburg á næstu leiktíð, hún hefur því lítið leikið með liðinu að undanförnu og rennur samningur hennar út um mánaðarmótin. Því er ljóst að Sara Björk hefur leikið sinn síðasta leik fyrir liðið.

Í byrjunarliði Bayer Leverkusen var hinsvegar Sandra María Jessen og hún spilaði allan leikinn. Hún gat þó ekki komið í veg fyrir 5-0 tap en Bayer Leverkusen heldur sér þó í efstu deild þar sem liðið er með betri markatölu en lið Köln sem fellur úr deildinni.

Tengdar fréttir

Fótbolti

Sara Björk ekki með Wolfsburg í bikarúrslitunum

Fótbolti

Sandra María framlengir við Bayer Leverkusen

Fótbolti

Sara Björk þýskur meistari fjórða árið í röð