Níu í sóttkví á Austurlandi - brýnt að herða tökin

27.06.2020 - 14:57
Mynd með færslu
 Mynd: RÚV/Rúnar Snær Reynisson - Skimun í Norrænu
Níu eru nú í sóttkví á Austurlandi vegna mögulegs COVID-19 smits. Aðgerðastjórn Almannavarna minnir Austfirðinga á að viðhalda öllum smitvörum. Þeir sem eru í sóttkví á Austurlandi hafa allir farið í sýnatöku og ættu niðurstöður að liggja fyrir í dag.

Svofelld tilkynning var send á fjölmiðla kl. 14.44:

„Samkvæmt upplýsingum frá sóttvarnalækni eru um þrjú hundruð manns víðs vegar af landinu í sóttkví sökum smits er greindist nýlega á höfuðborgarsvæðinu. Afleiðingarnar teygja sig víða og í dag eru níu þeirra búsettir eða dvelja hér í fjórðungnum. Allir hafa þeir farið í sýnatöku og ættu niðurstöður um smit að liggja fyrir síðar í dag.

Faraldurinn ekki horfinn og nauðsynlegt að herða tökin

Það er ekki nýmæli að einstaklingar séu hér í sóttkví né heldur teljast það sérstök tíðindi enda smit verið fá. Aðgerðastjórn sér þessa nýju stöðu þó sem alvarlega samfélagslega áminningu um að faraldurinn er ekki horfinn og að brýnt sé að við öll saman herðum tökin í baráttunni við COVID-19. Því minnum við einstaklinga, veitinga- og gistihúsaeigendur, félagasamtök, íþróttafélög, fyrirtæki, þjónustuaðila og aðra á að líta í eigin barm og meta hvort hjá viðkomandi sé enn rétt staðið að sóttvörnum.

Gagnlegar spurningar

Í því sambandi má nefna:
Held ég mig heima ef ég er með einkennin umtöluðu?
Veiti ég mér og öðrum rými til að virða 2 m regluna?
Nota ég handþvott og spritt af árvekni?
Eru sprittbrúsar til taks og á þá fyllt ?
Er strokið af sameiginlegum snertiflötum?  
Stend ég fyrir samkomuhaldi þ.á.m. íþróttaviðburðum sem hugsanlega er rétt að aflýsa?

Aðgerðastjórn mun í ljósi aðstæðna og á meðan óljóst er hvert stefnir, senda að nýju daglegar tilkynningar til upplýsinga og ábendinga um aðgerðir, leiðbeiningar og svo framvegis. 

Verum SAMAN í þessu hér eftir sem hingað til!“

Myndin var tekin við skimun í Norrænu og tengist efni fréttarinnar ekki beint. 

runarsr's picture
Rúnar Snær Reynisson
Fréttastofa RÚV
Síðast:
Þessi þáttur er í hlaðvarpi