Mynd: RÚV - Freyr Arnarson - RÚV
Margir þurfa í sóttkví í dag vegna Stjörnuleikmanns
Víðir Reynisson yfirlögregluþjónn hjá Ríkislögreglustjóra segir líklegt að margir þurfi að fara í sóttkví í dag vegna leikmanns Stjörnunnar sem greindist með kórónuveirusmit í morgun. Smitið er talið tengjast leikmanni Breiðabliks sem kom frá Bandaríkjunum 17. júní. Sýni hans á landamærunum var neikvætt en hins vegar fór hann aftur í sýnatöku á miðvikudaginn og það reyndist jákvætt.
Víðir Reynisson segir að á þriðja hundrað sýni hafi verið tekin í gær þeirra á meðal úr leikmanni Stjörnunnar. Niðurstaðan kom í morgun. Í gær greindist ráðuneytisstarfsmaður með smit sem tengist Breiðabliksleikmanninum.
„Smitrakning er í gangi en það virðist vera að þessi þrjú smit tengist, sem við höfum fengið núna á síðustu dögum.“
Af þessu eina nýja smiti er þá væntanlega smitrakning skammt á veg komin þannig að ekki er ljós hve margir þurfa að fara í sóttkví til viðbótar?
„Já, við erum bara nýbúin að fá grunnupplýsingarnar frá viðkomandi þannig að smitrakningin er bara rétt að hefjast.“
Það eru fleiri að fara í sýnatöku í dag og væntanlega heldur áfram eitthvað ef að þessi viðkomandi leikmaður hefur haft samskipti við marga?
„Já, já, það eru líkur á því að það séu margir sem að þurfa að bætast við á lista þeirra sem þurfa að fara í sóttkví í dag í tengslum við þetta,“ segir Víðir.
