Fjögur ný íslensk leikrit valin í Hádegisleikhúsið

Mynd með færslu
 Mynd: Þjóðleikhúsið

Fjögur ný íslensk leikrit valin í Hádegisleikhúsið

26.06.2020 - 14:41

Höfundar

Verk eftir Bjarna Jónsson, Sólveigu Eir Stewart, Jón Gnarr og Hildi Selmu Sigbertsdóttur urðu fyrir valinu í samkeppni Þjóðleikhússins og RÚV. Leikritin verða á dagskrá strax á næsta leikári í nýju Hádegisleikhúsi

Alls bárust 254 verk frá 194 höfundum í samkeppni Þjóðleikhússins og RÚV um verk fyrir nýtt Hádegisleikhús. Auglýst var eftir handritum og hugmyndum að styttri verkum fyrir Hádegisleikhúsið sem hefur göngu sína í haust.

Verkin sem voru valin eru eftir fjögur íslensk leikskáld, þau Bjarna Jónsson, Sólveigu Eir Stewart, Jón Gnarr og Hildi Selmu Sigbertsdóttur. Verkin verða frumsýnd í hinu nýja Hádegisleikhúsi Þjóðleikhússins í Þjóðleikhúskjallaranum leikárið 2020/21 auk þess sem  þau verða tekin upp fyrir sjónvarp og sýnd í Sunnudagsleikhúsi RÚV. Þá voru þrjú verk til viðbótar valin til þróunar og verða á dagskrá Hádegisleikhúss Þjóðleikhússins leikárið 2021/22.

„Við erum í skýjunum yfir þessari góðu þátttöku og viljum þakka öllum höfundum sem sendu okkur handrit kærlega fyrir, það eru spennandi tímar framundan hvað varðar íslenska leikritun í Þjóðleikhúsinu og sérstaklega skemmtilegt að þau verða líka tekin upp fyrir sjónvarp og sýnd á RÚV,“ segir Hrafnhildur Hagalín, listrænn ráðunautur Þjóðleikhússins.

„Ég held að Hádegisleikhúsið geti orðið mjög skemmtileg viðbót við hin sviðin okkar og vonandi vettvangur til framtíðar fyrir íslensk leikskáld sem vilja reyna fyrir sér í styttra leikritunarformi. Við lentum eiginlega í lúxusvanda því stór hluti verkanna var verulega spennandi og við erum búin að festa okkur þrjú verk til viðbótar við þessi fjögur, sem fara upp á þarnæsta leikári Hádegisleikhússins. Það er verið að klassa upp Kjallarann og verður gaman að bjóða gestum að koma í hann nýuppgerðan. Hádegisleikhúsið tekur til starfa strax í haust og við gerum ráð fyrir að sýnt verði að minnsta kosti þrjú og stundum fjögur hádegi í viku. Tilvalið fyrir starfsmannahópa, pör eða bara hvern sem er að eiga stefnumót í hádeginu í Kjallaranum okkar, snæða léttan hádegisverð og horfa á splunkunýtt íslenskt stuttverk.“

Mynd með færslu
 Mynd: Þjóðleikhúsið
Dómnefndin hefur varið síðustu vikum í að lesa innsend verk.

Þjóðleikhúsið og RÚV hleyptu af stokkunum samstarfsverkefninu fyrr í vor og auglýstu eftir handritum eða ítarlegum hugmyndum að verkum, um 20-25 mínútur að lengd fyrir nýtt Hádegisleikhús. Í dómnefndinni sátu þau Hrafnhildur Hagalín Guðmundsdóttir, Ólafur Egill Egilsson, Lára Jóhanna Jónsdóttir, Gréta Kristín Ómarsdóttir, Þorgerður E. Sigurðardóttir og Skarphéðinn Guðmundsson.

Tengdar fréttir

Leiklist

RÚV í samstarf við Þjóðleikhús um ritun leikverka