Varp hefur minnkað verulega í Eyjum og á Breiðafirði

25.06.2020 - 07:00
Mynd með færslu
 Mynd: Náttúrustofa Suðurlands
Stofnvöktun lunda hefur lokið skoðun á lundavarpi í tólf byggðum. Erpur Snær Hansen, forstöðumaður Náttúrustofu Suðurlands, segir varp áberandi minna en í fyrra á Breiðafirði og Vestmannaeyjum. 

Á Breiðafirði er um hálf milljón af lundaholum. Eitt lundapar getur búið og verpt í hverri holu en nýting þeirra er misjöfn milli ára. Erpur segir að í fyrra hafi verið verpt í 88 prósent af holunum en í ár er aðeins verpt í rúmlega helming þeirra. Þetta er tæp 34 prósenta minnkun milli ára. 

Í Vestmannaeyjum eru rúmlega milljón lundaholur. Þar hefur einnig verið verpt í rúmlega helming þeirra en í fyrra var verpt í 78 prósent þeirra. Erpur segir að í öðrum byggðum séu breytingarnar frá ári til árs litlar fyrir utan Lundey á Skjálfanda. Þar jókst varp um tæp þrettán prósent. 

Breiðafjörður og Vestmannaeyjar eru afar mikilvægar varpstöðvar en þar verpa um sextíu prósent íslenska lundastofnsins.

 

Stofnvöktun lunda, „lundarallið“, að störfum. Mynd: Náttúrustofa Suðurlands.
Lundar í bjargi. Mynd: Náttúrustofa Suðurlands.

Breyting á fæðu sennileg útskýring

Lundavarpið var sérlega gott í Eyjum á síðasta ári en útlit er fyrir að færri pysjur líti dagsins ljós í sumar. 

Erpur segir hins vegar að varpið sé snemma á ferð í Vestmannaeyjum í ár en hann rakst á tvo unga þar við skoðunina. Hann segir að ungarnir ættu að verða orðnir fleygir í byrjun ágúst ef þeir vaxa á eðlilegum hraða. „Það er þremur vikum fyrr en þetta hefur verið síðastliðin tíu ár eða svo,“ segir Erpur. 

Lundinn hefur átt á brattann að sækja undanfarin ár og stofninn fer minnkandi. Hann er einn þriggja fugla sem eru á válista Náttúrufræðistofnunar Íslands yfir fuglategundir í bráðri hættu. 

Erpur segir athyglisvert að varp í Faxaflóa standi nokkurn veginn í stað milli ára á meðan bakslag er á Breiðafirði. „Þessir staðir hafa haldist í hendur þessi tíu ár sem við höfum verið að skoða þetta, svo þetta er nokkuð sérstakt,“ segir hann. Erpur segir að ástæðan fyrir minnkun varps á Breiðafirði og í Vestmannaeyjum tengist breytingum á fæðu. Stofnvöktun lunda, eða „lundarallið“ eins og það er gjarnan kallað, ætlar að fara aðra ferð í varpstöðvarnar í júlí til þess að gá að ungunum og sjá hve margir komast á legg.

Nína Hjördís Þorkelsdóttir
Fréttastofa RÚV
Síðast:
Þessi þáttur er í hlaðvarpi