Sigríður segir að það hafi verið Guðmundur sem stakk upp á að þau kæmu sér og þjóðinni í sumarskap með Sólarsambanu en hún hafi sjálf gert sér grein fyrir að það væri í raun langþráður draumur að rætast. „Ég var að segja um daginn að ég man eftir að langa ógeðslega mikið að vera Magga Gauja. Að vera lítil stelpa sem tæki þátt í Eurovision,“ segir Sigríður. Sigurður man eftir játningunni. „Og ef minnið svíkur mig ekki hafði þetta lag borist í tal fyrr en fékk ekki alveg að vera með þá. En við verðum öll alveg Margrét Gauja inni í okkur.“

Sem fyrr segir er hópurinn á leið í hringferð um landið í fjórða skipti og er eftirvænting mikið. „Þetta er eitt það gáfulegasta sem maður getur gert á sumrin, að halda sér á Íslandi og fara hringinn. Helst tvo,“ segir Sigurður. En í þetta skipti ætla þau ekki að láta nægja að taka hljóðfærin með heldur verður einnig myndavél í farangrinum. „Við ætlum að freista þess að gera smá heimildarþátt um ævintýrið.“

Á ferðalaginu fara þau vítt og breitt um landið og eiga viðkomu meðal annars í Þórsmörk, á Patreksfirði og í Berufirði. „Það er gaman að gera þetta í fjórða skipti, maður fer ekki bara á nýja staði heldur á sömu staði að hitta fólk aftur. Fólk kemur ár eftir ár og við kynnumst heimamönnum og eignumst vini.“

Rætt var við Sigurð og Sigríði í Popplandi á Rás tvö.