Mynd: Vilhjálmur Þór Guðmundsson - RÚV
Athugið þessi frétt er meira en 9 mánaða gömul.
Einn fluttur á sjúkrahús eftir eldsvoða í Keflavík
Maður var fluttur á sjúkrahús vegna gruns um reykeitrun eftir að eldur kviknaði á veitingastaðnum Kebab house við Hafnargötu í Keflavík í morgun.
Slökkvilið Brunavarna Suðurnesja var kallað út laust fyrir klukkan tíu og gekk slökkvistarf vel að sögn Brunavarna Suðurnesja. Sá sem var fluttur á sjúkrahús hafði reynt að slökkva eldinn sem kom upp í steikarpotti í eldhúsi. Hann hlaut minniháttar brunasár.
Talsvert tjón varð á staðnum vegna mikils hita og þurfti að reykræsta íbúðir á efri hæðum hússins.
