Athugið þessi frétt er meira en 9 mánaða gömul.

Kortavelta í maí jókst á milli ára

Mynd með færslu
 Mynd: Skjáskot - RÚV
Kortavelta innanlands í maí var 3,3% meiri en í sama mánuði í fyrra.  Kortavelta Íslendinga erlendis dróst saman um 63,3% og viðsnúningur varð í neyslu landsmanna í maí eftir samdrátt mánuðanna á undan.  Þetta kemur fram í Hagsjá, sem er rit Hagfræðideildar Landsbankans. Kortavelta Íslendinga á innlendum gististöðum í maí jókst um 60% á milli ára.

Í Hagsjá segir að velta innlendra greiðslukorta í verslunum og þjónustu hér á landi hafi numið 82 milljörðum króna í maímánuði.  Þegar óvissa vegna COVID-19 hafi verið sem mest, í mars og apríl, hafi samdráttur verið í kortaveltu samanborið við árið í fyrra. Í mars nam hann 7% og í apríl tæp 13%.

Kortavelta Íslendinga í fataverslunum jókst um 18% á milli ára í maí eftir samdrátt í mars og apríl og velta tengd menningar-, afþreyingar- og tómstundastarfi jókst um rúm 50% milli ára.

63,3% minni kortavelta erlendis

Velta innlendra greiðslukorta í útlöndum var tæpir 7 milljarðar í maí, það var 63,3% minni velta en í maí í fyrra miðað við fast gengi. Í apríl var velta kortanna í útlöndum um 6 milljarðar og samdrátturinn þá var 67% á milli ára. Á þessum tíma voru mörg landamæri lokuð og fáir Íslendingar á ferð utanlands og því megi gera ráð fyrir að þessa velta erlendis hafi verið í formi netverslunar.

Kortavelta á snyrtistofum í maí í ár var 77% meiri en í sama mánuði í fyrra og er það rakið til lokana á slíkri þjónustu í apríl.

 

annalth's picture
Anna Lilja Þórisdóttir