Vinna nefndarinnar varð marklaus vegna upphlaupa

Þórhildur Sunna Ævarsdóttir, þingmaður Pírata, gagnrýndi harðlega viðhorf forsætisráðherra um að telja það góð málalok að ljúka frumkvæðisathugun stjórnskipunar- og eftirlitsnefndarinnar í ósætti fremur en með efnislegri meðferð. Hún sagði vinnu nefndarinnar vegna athugunar á hæfi Kristjáns Þórs Júlíussonar og stöðu hans gagnvart Samherja hafi verið orðna marklausa.

Hún hafi sagt upp sem formaður nefndarinnar til þess að geta varpað ljósi á að gagnrýni sem hún sætti sem formaður nefndarinnar væru skálkaskjól meirihlutans til að beita aðferðum sem hún sé ósammála.

„Ég er að segja að vinna nefndarinnar var orðin marklaus vegna síendurtekinna upphlaupa, sem snúa að endalausum ásökunum um að ég væri að misnota stöðu mína þegar ég var að beita mínu valdi, að ég væri að traðka á virðingu nefndarinnar og svo framvegis.“

Þórhildur Sunna sagði að það að loka þessu máli með bókun þrátt fyrir ósætti innan nefndarinnar hafi sett slæmt fordæmi um að þegar meirihlutanum „sé farið að leiðast frumkvæðisathugun, ef honum líkar ekki þær upplýsingar sem komnar eru fram,“ geti hann í andstöðu við minnihluta lokað málinu óformlega með bókun.

Hún gagnrýndi harðlega að forsætisráðherra skuli veita blessun sína yfir þá aðferðafræði og líkti því við þöggun og leyndarhyggju.

 

 

Valgerður Árnadóttir
Síðast:
Þessi þáttur er í hlaðvarpi