Athugið þessi frétt er meira en 12 mánaða gömul.

ESB segir MS óheimilt að nota vöruheitið feta

12.06.2020 - 08:33
Mynd með færslu
 Mynd: Mynd af heimasíðu MS - MS
Framkvæmdastjórn Evrópusambandsins fer fram á að íslensk stjórnvöld sjái til þess að MS hætti að nota heitið feta i ostaframleiðslu sinni. Grikkland hafi einkarétt á því.

Gríski Evrópuþingmaðurinn Emmanouil Fragkos lagði í apríl fram fyrirspurn um fetaostframleiðslu MS. Hann segir að fetaostur sé búinn til úr mjólk úr þarlendum ám og geitum og ýmsar reglur og skilyrði séu fyrir því að kalla ostinn feta. Nafnið sé upprunavarið og ekki megi kalla sambærilega osta þessu nafni séu þeir framleiddir utan Grikklands, að ekki sé talað um utan Evrópusambandsins, og með annarri aðferð.

Kvartanir hafi borist um víðtæka notkun MS á nafninu feta, eins og Feta kubbur, Dala feta, Salat feta, Grísk jógúrt og svo framvegis. Fragkos spyr því hvort þessi notkun MS á heitinu sé lögleg og hvernig verði staðið að því að vernda einkaréttinn. Í svari framkvæmdastjórnarinnar segir að fyrsta maí 2016 hafi tekið gildi samkomulag Evrópusambandsins og Íslands þar sem veitt er landfræðileg vernd fyrir matvörur. Einkaréttur á notkun heitisins feta falli þar undir og bannað sé að nota nafnið , hvort heldur er beint eða óbeint. Fram kemur í svari framkvæmdastjórnarinnar að þegar hafi verið haft samband við íslensk stjórnvöld þar sem kallað er eftir staðfestingu á notkun MS á heitinu feta og ef rétt reynist verið gripið til viðeigandi ráðstafana.
 

 

holm's picture
Haukur Holm
Fréttastofa RÚV