Athugið þessi frétt er meira en 10 mánaða gömul.

Afkoma hins opinbera neikvæð um 32 milljarða

Mynd með færslu
 Mynd:
Tekjur hins opinbera drógust saman um 5,3% frá fyrsta ársfjórðungi í fyrra samkvæmt áætlun Hagstofunnar. Áætlað er að afkoman sé neikvæð um 32,2 milljarða, sem er um 4,8% af vergri landsframleiðslu á ársfjórðungnum.

Engar arðgreiðslur tekjufærðar miðað við 5,3 milljarða í fyrra

Hallann má rekja til samdráttar í helstu tekjustofnum ríkissjóðs, skatta á tekjur og hagnað, virðisaukaskatt og tryggingargjald. Að auki voru engar arðgreiðslur tekjufærðar frá fjármálafyrirtækjum samanborið við tekjufærðan arð upp á 5,3 milljarða króna á fyrsta ársfjórðungi í fyrra.

Tekjuafkoma hins opinbera á fyrsta ársfjórðungi í fyrra var neikvæð um 0,5 prósent af vergri landsframleiðslu eða 3,4 milljarða.

Stjórnvöld birtu niðurstöður 20. maí úr yfirferð á þeim aðgerðum sem þegar hefur verið ráðist í vegna kórónuveirufaraldursins. Bein útgjöld vegna þeirra voru þá ríflega hundrað milljarðar króna.

Áhrif COVID-19 á afkomuna skýrist á næsta ársfjórðungi

Hagstofan greinir frá því að áhrif COVID-19 gæti þegar í tekjusamdrætti og auknum útgjöldum til Atvinnuleysistryggingasjóðs. Áhrif faraldursins sjáist með meira afgerandi hætti á næsta ársfjórðungi þegar ráðist verður í þær aðgerðir sem stjórnvöld hafa boðað til og koma til framkvæmda þá.