Athugið þessi frétt er meira en mánaðargömul.

Ekki þörf á könnun á hæfi Kristjáns Þórs í Samherjamáli

Mynd með færslu
 Mynd:
Meiri­hluti stjórn­skip­un­ar- og eft­ir­lits­nefndar Alþingis vill hætta frum­kvæð­is­at­hugun á hæfi Krist­jáns Þórs Júl­í­us­sonar, sjáv­ar­út­vegs- og land­bún­að­ar­ráð­herra, vegna stöðu hans gagn­vart útgerðarfyrirtækinu Sam­herja. Þórhildur Sunna Ævarsdóttir, þingmaður Pírata og einn nefndarmanna, segir niðurstöðuna til þess fallna að veikja Alþingi og traust almennings á því.

Þessi afstaða kom fram í bókun Líneikar Önnu Sævarsdóttur, þingmanns Framsóknarflokks, á fundi nefndarinnar á föstudaginn, en hún  var framsögumaður málsins.  Þingmennirnir Þórhildur Sunna Ævarsdóttir, Guðmundur Andri Thorsson og Andrés Ingi Jónsson samþykktu á fundi nefndarinnar 6. desember í fyrra að athugunin yrði hafin, en samkvæmt 13. grein þingskaparlaga skal slík athugun fara fram, komi beiðni frá að minnsta kosti fjórðungi nefndarmanna.

Óskað eftir greinargerð og sérfræðingar kallaðir til

Í kjölfarið óskaði nefndin eftir greinargerð frá Kristjáni Þór með tilteknum upplýsingum er varðar lagaákvæði sem gilda við mat á hæfi ráðherra, verklag við mat á hæfi hans með tilliti til skráðra og óskráðra hæfisreglna stjórnsýsluréttar og hvort og þá með hvaða hætti hafi reynt á hæfi ráðherrans í málum tengdum Samherja og/eða tengdum aðilum. „Atvinnuvega- og nýsköpunarráðuneytið svaraði beiðninni með ítarlegri greinargerð dagsettri 16. janúar 2020. Ráðherra mætti síðan á opinn fund stjórnskipunar- og eftirlitsnefndar 22. janúar 2020 og gerði frekari grein fyrir þeim atriðum er beiðnin laut að og svaraði spurningum nefndarmanna,“ að því er segir í fundargerðinni.

Þar segir ennfremur að á fundi nefndarinnar 4 . mars hafi málið verið rætt og nefndarmenn sammælst um að kalla sérfræðinga aftur til fundar við nefndina. Þau Andrés Ingi Jónsson, Guðmundur Andri og Þórhildur Sunna  ákváðu að senda framhaldsfyrirspurn til sjávarútvegs- og landbúnaðarráðherra. Óskuðu þau eftir skriflegum svörum við 16 spurningum með bréfi þann 9. mars. Atvinnuvega- og nýsköpunarráðuneytið svaraði spurningunum með bréfi dagsettu 23. mars 2020.

Hvorki fjárhagslegir né persónulegir hagsmunir

Á fundi nefndar þann 4. júní komu gestir fyrir nefndina meðal annars sérfræðingar í stjórnsýslurétti og svöruðu spurningum nefndarmanna.

Í bókun Líneyjar Önnu segir að eftir umfjöllun nefndarinnar liggi eftirfarandi fyrir: „Sjávarútvegs- og landbúnaðarráðherra hefur engra hagsmuna að gæta af Samherja eða tengdum félögum í skilningi stjórnsýslulaga, hvorki fjárhagslegra né persónulegra. Samkvæmt lögum metur ráðherra hæfi sitt sjálfur og ekkert hefur komið fram um að framkvæmd eða verklag á því mati hafi farið í bága við lög og reglur. Ég tel frekari könnun tilgangslausa og tel ekki tilefni til frekari umfjöllunar um þessa frumkvæðisathugun innan stjórnskipunar- og eftirlitsnefndar.“

Undir bókunina tóku Birgir Ármannsson, Óli Björn Kárason, Þórunn Egilsdóttir, Þorsteinn Sæmundsson og Kolbeinn Óttarsson Proppé. 

Merki um vanvirðingu

Í kjölfarið lagði Þórhildur Sunna fram bókun. Þar segir meðal annars að ágreiningur sé um framhald málsins á milli þess hluta nefndarmanna sem óskaði eftir frumkvæðisathuguninni og meirihlutans sem frá upphafi var mótfallinn því að þessi athugun færi fram. Hún lagði til að þann ágreining mætti leysa með því að fela framsögu málsins nefndarmanni sem teldi ástæðu til frekari skoðunar á því. 
„Afstaða meirihlutans ber merki um vanvirðingu fyrir réttindum og hlutverki minni hlutans á þingi, ýtir undir grunsemdir um samtryggingu og leyndarhyggju, lítilsvirðir sérstakt eftirlitshlutverk stjórnskipunar- og eftirlitsnefndar og er til þess fallin að veikja Alþingi og traust almennings á því. Minnihlutinn harmar þessa afstöðu,“ sagði í bókun Þórhildar Sunnu og tóku Andrés Ingi Jónsson og Guðjón Brjánsson undir hana.

Í kjölfarið agði Andrés Ingi til að Þórhildur Sunna yrði framsögumaður málsins í stað Líneyjar Önnu. Gengið var til atkvæða um þá tillögu og var hún felld. 

 

annalth's picture
Anna Lilja Þórisdóttir