Fimmtudaginn 4. júní, veitti Miðstöð íslenskra bókmennta fjórum nýjum höfundum Nýræktarstyrki fyrir verk þeirra, en hver styrkur nemur hálfri milljón króna. Lilja Alfreðsdóttir, mennta- og menningarmálaráðherra, afhenti styrkina við athöfn í Gunnarshúsi, húsi Rithöfundasambandsins.

Nýræktarstyrkir eru veittir árlega fyrir skáldverk höfunda sem eru að stíga sín fyrstu skref á ritvellinum, óháð aldri, og til að hvetja þá til frekari dáða á þeirri braut. Átt er við skáldverk í víðri merkingu; sögur, ljóð, leikrit og fleira.

Verkin sem hljóta viðurkenninguna í ár eru ljóðabækur, furðusaga og smásögur. Nýræktarstyrki Miðstöðvar íslenskra bókmennta 2020 hljóta eftirtalin verk og höfundar:

500 dagar af regni
Smásögur
Höfundur: Aðalsteinn Emil Aðalsteinsson 

Taugaboð á háspennulínu
Ljóðabók
Höfundur: Arndís Lóa Magnúsdóttir 

Skuggabrúin
Furðusaga
Höfundur: Guðmundur Ingi Markússon

Þagnarbindindi
Ljóðsaga
Höfundur: Halla Þórlaug Óskarsdóttir 

Að vali styrkhafa standa bókmenntaráðgjafar Miðstöðvar íslenskra bókmennta, sem í ár eru þau Bergsteinn Sigurðsson og Erna Erlingsdóttir. Hægt er að kynna sér höfunda og verkin betur á vef Miðstöðvar íslenskra bókmennta.