Lilja braut jafnréttislög með ráðningu Páls Magnússonar

Mynd með færslu
 Mynd: Vilhjálmur Þór Guðmundsdótt - RÚV
Lilja Dögg Alfreðsdóttir menntamálaráðherra braut jafnréttislög með ráðningu Páls Magnússonar í embætti ráðuneytisstjóra menntamálaráðuneytisins. Þetta er niðurstaða kærunefndar jafnréttismála. Menntamálaráðherra vanmat konuna sem kærði, í samaburði við Pál.

Embætti ráðuneytisstjóra í menntamálaráðuneytinu var auglýst í júní í fyrra og þrettán umsóknir bárust. Hæfisnefnd mat fjóra hæfasta og var sú sem kærði ráðninguna, Hafdís Helga Ólafsdóttir, ekki þar á meðal. Auk Páls voru tvær konur og einn karl í þeim hópi.

Páll var varaþingmaður Framsóknarflokksins í tvö kjörtímabil í kringum aldamót og aðstoðarmaður Valgerðar Sverrisdóttur ráðherra Framsóknarflokksins. Páll var síðast sviðsstjóri stjórnsýslusviðs og bæjarritari Kópavogsbæjar. Hafdís Helga er skrifstofustjóri í forsætisráðuneytinu en hafði áður meðal annars verið forstöðumaður nefndarsviðs Alþingis og fulltrúi forsætisráðuneytisins í sendiráði Íslands í Brussel.

Fékk ekki öll gögn í fyrstu

Hafdís Helga óskaði eftir rökstuðningi fyrir ráðningunni í nóvember og öllum gögnum málsins. Hún fékk rökstuðninginn en ráðuneytið neitaði að afhenda henni öll gögn með þeirri skýringu að einkahagsmunir annarra væru ríkari en hagsmunir Helgu. Helga gerði athugasemd við þá ákvörðun sem hún ítrekaði þrívegis og fékk loks öll gögn afhent í janúar. Hún kærði ráðninguna til kærunefnd jafnréttismála í mars og úrskurður var kveðinn upp 27. maí. 

Vanmat Hafdísi samanborið við Pál

Í honum segir að ýmissa annmarka hefði gætt af hálfu menntamálaráðherra við mat á Hafdísi Helgu og Páli. Lilja hefði vanmetið Hafdísi samanborið við Pál varðandi menntun, reynslu af opinberri stjórnsýslu, leiðtogahæfileika og hæfni til að tjá sig í riti. Í niðurstöðu kærunefndarinnar segir að verulega skorti á efnislegan rökstuðning menntamálaráðherra fyrir ráðningunni og ljóst sé að Páll hafi ekki staðið Hafdísi Helgu framar við ráðninguna.

Menntamálaráðherra hafi ekki tekist að sýna fram á að aðrar ástæður en kynferði hafi legið til grundvallar ráðningunni og því hafi Lilja Dögg brotið gegn jafnréttislögum. 

Lögmaður Hafdísar Helgu, Áslaug Árnadóttir, segir að Hafdís sé að íhuga næstu skref og hvort hún fari fram á bætur. 
 

sigridurda's picture
Sigríður Dögg Auðunsdóttir
Síðast:
Þessi þáttur er í hlaðvarpi