Opnað í Reykjadal á sunnudaginn

28.05.2020 - 23:17
Mynd með færslu
 Mynd: RÚV
Gönguleiðin inn Reykjadal verður opnuð næsta sunnudag, eftir lokun undanfarandi vikna. Undanfarið hafa gönguleiðir verið endurbættar en jafnframt hefur verið sett upp ný brú yfir Hengladalaá sem leysir af hólmi gömlu staurabrúna. 

Á vef Hveragerðisbæjar kemur fram að göngustígurinn hefur tekið nokkrum breytingum og hefur hann verið færður frá hverunum í hlíðinni í dalnum en þar hafði skapast mikið hættuástand sem þurfti að bregðast við. Brúin sem lögð hafði verið yfir hverinn hefur verið fjarlægð. Göngumenn eru hvattir til að taka tillit til aðstæðna þegar þeir eru á ferð á þessum slóðum. Þeir þurfa að muna að verið er að fara um svæði þar sem hverir geta skapað hættu og verið hættulegir á mörgum stöðum. Göngumenn eiga ávallt að fylgja merktum gönguleiðum.

Við baðstaðinn eru gestir beðnir um að ganga snyrtilega um og taka með sér sundföt og handklæði þegar svæðið er yfirgefið sem og annað rusl.   Engin salerni eða ruslafötur eru við gönguleiðina eða baðstaðinn enda er gert ráð fyrir að það sem kemur í dalinn fari allt þaðan aftur.  

 

Jón Hákon Halldórsson
Fréttastofa RÚV
Síðast:
Þessi þáttur er í hlaðvarpi