Flugfreyjur hafa boðið tímabundinn fleytisamning

22.05.2020 - 15:58
Flugfreyjufélag Íslands heldur félagsfund um kjaradeilu við Icelandair á Hilton Nordica. Fundargestir spjalla eftir fundinn.
 Mynd: RÚV
Flugfreyjur hafa boðið Icelandair svokallaðan fleytisamning til að hjálpa flugfélaginu yfir erfiðasta hjallann í kreppunni. Guðlaug Líney Jóhannsdóttir, formaður Flugfreyjufélagsins segir þó ekki koma til greina að skerða laun og réttindi  flugfreyja til frambúðar.

 

 

Félagið hélt þrjá félagsfundi í dag til að fara yfir stöðuna í kjaradeilunni við Icelandair.

„Það er gífurleg samstaða í hópnum og einhugur í fólki að standa á því sem við höfum boðið, sem eru miklar tilslakanir og hóflegar launahækkanir," segir Guðlaug. Hún segir að félagsfólki sé brugðið yfir bréfi Boga Nils Bogasonar, forstjóra Icelandair, í gær. Það sé klárt brot á leikreglum í kjaraviðræðum, en að auki hafi upplýsingarnar í honum verið rangar.

„Sá samanburður sem hann greinir frá er frá fyrra tilboði Icelandair. Þannig að það er erfitt fyrir þá sem ekki vita um hvað málið snýst. Þetta líta út eins og hækkanir, en eru lækkanir um fram allt, þó svo að dregið hafi verið úr einhverjum atriðum frá síðasta tilboði," segir Guðlaug.

Skerðum ekki kjör til frambúðar

Hafið þið engar áhyggjur af því að þið séuð að veikja flugfélagið á þessu erfiða tímabilið þegar það er verið að reyna að fjármagna félagið upp á nýtt?

„Ég vísa því alfarið á bug að stétt flugfreyja og þjóna geti staðið í vegi fyrir velgengni félagsins eða borið ábyrgð á því ef illa fer. Við erum í kjaradeilu um lífsviðurværi okkar fólks. Það þarf að bera virðingu fyrir því og á meðan sýnum við rikan samningsvilja til að ganga frá samningum, en við ætlum ekki að taka það á okkur að breyta kjörum og skerða þau til frambúðar vegna ástandsins.":

Seðlabankastjóri sagði í fyrradag að verkalýðsfélög hefðu kannski ekki alveg axlað ábyrgð á ástandinu núna og gaf í skyn að það hefði verið eðlilegt að semja um lægra kaup í ákveðinn tíma, hvað finnst þér um þá gagnrýni? 

„Ja, við höfum undanfarnar vikur komið með lausn, svokallaðan fleytisamning, þar sem fólk tekur á sig aukna vinnu í ákveðinn tíma, við erum jákvæð fyrir því. En að skerða laun, réttindi og auka vinnuskyldu til frambúðar er eitthvað sem við höfnum alfarið," segir Guðlaug.