Flugfreyjur hafna lokatilboði Icelandair

20.05.2020 - 14:44
Mynd með færslu
 Mynd: Haukur Holm
Samninganefnd Flugfreyjufélags Íslands hefur hafnað tilboði Icelandair, sem félagið ítrekaði á fundi samninganefnda félaganna í dag. Forstjóri félagsins segir að um hafi verið að ræða lokatilboð, nú verði aðrar leiðir skoðaðar. Koma þurfi félaginu í gegnum þær aðstæður sem nú séu uppi.

Þetta kemur fram í fréttatilkynningu frá Icelandair.

Þar segir að félagið hafi í fyrradag lagt fram nýtt tilboð að kjarasamningi til Flugfreyjufélags Íslands (FFÍ). Til hafi staðið að funda hjá Ríkissáttasemjara seinnipartinn í gær en að ósk samninganefndar FFÍ var fundi frestað til hálf níu í morgun.

„Eftir að FFÍ lagði fram tillögur sem ræddar voru í morgun ítrekaði Icelandair lokatilboð sitt sem tók mið af þeirri umræðu sem fór fram, að því marki sem félagið treysti sér til. Í kjölfarið hafnaði samninganefnd FFÍ tilboði Icelandair,“ segir í tilkynningunni.

Segja tillögur FFÍ vera langt frá markmiðum

Þar segir að það sé mat Icelandair að tillögur FFÍ séu þess eðlis að samningurinn fari í kjölfarið langt frá þeim markmiðum sem sett voru í kjaraviðræðum félagsins við stéttarfélög flugstétta. „Icelandair hefur þegar gert langtímasamninga við Félag íslenskra atvinnuflugmanna (FÍA) og Flugvirkjafélag Íslands (FVFÍ). Þeir samningar kveða í meginatriðum á um sveigjanleika og viðbót við vinnuskyldu og styðja þar með við markmið Icelandair Group um að auka samkeppnishæfni félagsins á alþjóðamarkaði en á sama tíma verja ráðstöfunartekjur starfsfólks og tryggja því gott starfsumhverfi,“ segir í tilkynningunni.

Þar segir að tilboðið sem samninganefnd FFÍ hafnaði hafi innihaldið eftirgjafir frá fyrra tilboði Icelandair sem áttu að koma til móts við þau sjónarmið félagsmanna sem upp komu eftir síðasta tilboð Icelandair. „Tilboðið fól meðal annars í sér hækkun allra grunnlauna, með sérstakri áherslu á lægstu laun, val um starfshlutfall, að flugstundahámörk innan mánaðar væru færð niður, auk þess sem skorður voru settar um hámarksfjölda lausráðinna flugfreyja og flugþjóna,“ segir í tilkynningu Icelandair.

„Þetta var okkar lokatilboð“

Þar er haft eftir Boga Nils Bogasyni, forstjóra Icelandair, að þetta séu mikil  vonbrigði. „Þetta var okkar lokatilboð og byggir það á sama grunni og þeir samningar sem gerðir hafa verið við stéttarfélög flugmanna og flugvirkja. Í tilboðinu eru fólgnar grunnlaunahækkanir, aukinn sveigjanleiki varðandi vinnutíma en á sama tíma tryggir það samkeppnishæfni og sveigjanleika Icelandair. Því miður verður ekki lengra komist í viðræðum við Flugfreyjufélag Íslands og þurfum við nú að skoða aðrar leiðir. Við ætlum okkur að koma félaginu í gegnum þær krefjandi aðstæður sem nú ríkja og styrkja rekstur þess til framtíðar.”

Viðræður Icelandair og Flugfreyjufélagsins hafa staðið yfir um nokkurra vikna skeið. Áður höfðu samninganefndir Icelandair og FFÍ átt í viðræðum í um 16 mánuði án þess að niðurstaða fengist í kjaramál flugfreyja og flugþjóna.