Athugið þessi frétt er meira en 9 mánaða gömul.

Stúdentar krefjast nærri fjögurra milljarða frá ríkinu

Mynd með færslu
 Mynd: Anton Brink RÚV - RÚV Anton Brink
Stúdentaráð Háskóla Íslands hyggst fyrir hönd stúdenta krefjast endurgreiðslu þess atvinnutryggingagjalds sem tekið hefur verið af launum stúdenta allt frá árinu 2010. Upphæðin nemur um 3,9 milljörðum króna. Námsmenn hafa haft verulegar áhyggjur af afkomu sinni vegna kórónuveirunnar og samkomubannsins sem henni hefur fylgt.

Stúdentar voru sviptir rétti til atvinnuleysisbóta í námshléum árið 2010 en áfram var haldið að taka tryggingagjald af launum þeirra.  

Það á við séu námsmenn skráðir í meira en tíu eininga nám. Á hinn bóginn segir Isabel Alejandra Diaz forseti Stúdentaráðs að þeir séu í þröngri stöðu því Lánasjóður íslenskra námsmanna krefjist að stúdentar ljúki 22 einingum til að eiga rétt á lágmarksframfærsluláni til níu mánaða. Þannig falli þeir milli kerfa og njóti ekki jafnræðis, segir Isabel. 

Hún segir að stúdentar vinni launuð störf að meðaltali um 26 stundir á viku auk námsins sem sé auðvitað full vinna líka. Margir leggi fé til hliðar fyrir komandi námsár. Stúdentar treysta á aðra innkomu en námslán þrjá mánuði ársins og krefjast nú aðgangs að sama öryggisneti og annað fólk á vinnumarkaði. Að sögn Isabel er ekki raunhæfur kostur fyrir námsmenn að vera án innkomu yfir sumartímann.  

Isabel segir Stúdentaráð vilja með kröfunni vekja stjórnvöld til umhugsunar um stöðu námsmanna. Hún bendir á að þau 3400 störf sem standi námsmönnum til boða í sumar muni langt í frá gagnast öllum enda séu um 30 þúsund um hituna.