Segir fulla þörf á vaxtalækkun

16.05.2020 - 12:58
Mynd með færslu
 Mynd: RUV
Aðalhagfræðingur Samtaka iðnaðarins á von á vaxtalækkun í næstu viku og segir að nýta eigi vexti og önnur tæki til að hjálpa fyrirtækjum og heimilum í gegnum samdráttinn. Gott svigrúm sé í opinberum fjármálum og Seðlabankinn hafi verið hljóður í nokkurn tíma.

Bæði Landsbankinn og Íslandsbanki gáfu fyrir helgi út spár um efnahagshorfurnar. Þar er talað um efnhagsáfall aldarinnar. Landsbankinn gerir ráð fyrir tæplega 9% samdrætti á árinu, en Íslandsbanki rúmlega 9%. 

„Það er alveg munur á þessum spám samt þó að þessar tvær frá bönkunum séu mjög keimlíkar.  Þá sjáum við að S&P er að spá 7,5% samdrætti og síðar eru SA og Viðskiptaráð með rétt um 13% og þessi munur endurspeglar þá miklu óvissu sem er til staðar í svona spágerð við þessar aðstæður. Við vitum ekki nákvæmlega hvernig árið spilast og kannski ekki síst hvernig gengur að drífa hagvöxtinn þegar við lítum fram á seinni helming ársins og næsta ár,“ segir Ingólfur Bender  aðalhagfræðingur Samaka iðnaðarins.

Mikill samdráttur sé í gjaldeyristekjum einkum vegna ferðaþjónustunnar og mikil óvissa sé með viðspyrnu á árinu.

„En síðan er það líka bara það sem er að gerast hérna  í innlendri eftirspurn, bæði þá neyslu og fjárfestingu sem að hefur dregist verulega saman vegna COVID, reyndar var kominn samdráttur fyrir það en búið að bæta verulega svötru ofan á það.“

Ingólfur segir spárnar hjálpleg tæki til að meta stöðuna og gera sér grein fyrir því hvað eigi að gera. Báðir bankarnir spá vaxtalækkun í næstu viku og að vextir í árslok verði komnir  í hálft prósent eða 0,75%. Ingólfur býst einnig við vaxtalækkun.

„Já, ég á von á vaxtalækkun, full þörf á því. Seðlabankinn er búinn að vera hljóður í svolítinn tíma, það er gott svigrúm í peningamálum reyndar líkt og í opinberum fjármálum til þess að taka á og mæta þessari niðursveiflu með þá vaxtalækkun og síðan þá útgjaldaaukningu á sviði ríkisfjármála. Og við eigum bara að nýta þessi tæki af fullum þunga til þess að hjálpa okkur í gegnum þetta, bæði fyrirtækjum og heimilum.“