Börn stærstu hluthafa fá nær öll hlutabréfin í Samherja

15.05.2020 - 14:21
Mynd með færslu
 Mynd: Af vef SVN - Þorsteinn Már Baldvinsson
Aðaleigendur Samherja hf., þau Helga Steinunn Guðmundsdóttir, Þorsteinn Már Baldvinsson, Kristján Vilhelmsson og Kolbrún Ingólfsdóttir, hafa framselt hlutabréfaeign sína í Samherja hf. til barna sinna. Þetta kemur fram í tilkynningu á vef Samherja. Áttu þau samtals 86,5% hlut í fyrirtækinu sem verður 2% eftir breytingarnar.

Stærstu hluthafar Samherja verða nú Baldvin Þorsteinsson og Katla Þorsteinsdóttir, sem fara samanlagt með um 43% hlut í fyrirtækinu. Dagný Linda Kristjánsdóttir, Halldór Örn Kristjánsson, Kristján Bjarni Kristjánsson og Katrín Kristjánsdóttir fara samanlagt með um 41,5% hlutafjár.

Í tilkynningunni segir að undirbúningur þessara breytinga á eignarhaldi hafi staðið undanfarin tvö ár en áformin og framkvæmd þeirra voru formlega kynnt í stjórn félagsins á miðju ári 2019. 

Þorsteinn Már Baldvinsson forstjóri og Kristján Vilhelmsson útgerðarstjóri gegna áfram störfum sínum hjá Samherja. Þorsteinn Már vék tímabundið úr forstjórastól fyrirtækisins í tengslum við umfjöllun um Samherjaskjölin svokölluðu en tók aftur við stjórnartaumunum í lok mars. Samherji fékk norsku lögmannsstofuna Wikborg Rein til að gera athugun á starfsemi dótturfélags fyrirtækisins í Namibíu vegna ásakana sem koma fram í skjölunum, en tafir hafa orðið á þeirri rannsókn. 

Haft er eftir Þorsteini Má og Kristjáni í tilkynningunni að félagið hafi vaxið og dafnað þrátt fyrir ýmsa erfiðleika. 

„Við frændurnir höfum fullan metnað til að taka þátt í áframhaldandi rekstri Samherja. Félagið á mikla og bjarta framtíð fyrir sér og hefur vaxið og dafnað þrátt fyrir ýmsa erfiðleika. Starfsfólk okkar hefur sýnt eigendum og félaginu einstakt traust í áratugi og lagt grunn að þeim stöðugleika sem er lykilatriði í starfseminni. Nú fáum við nýja kynslóð til liðs við okkur. Við fáum tækifæri til að halda áfram að skapa verðmæti með fullnýtingu hráefnis, veita vinnu og starfsöryggi og tryggja enn frekar þau mikilvægu gildi um sjálfbærni og vandaða umgengni um auðlindina sem verið hefur stefna Samherja frá upphafi,“ segir í tilkynningunni.

Fréttin hefur verið uppfærð.

Þórhildur Þorkelsdóttir
Fréttastofa RÚV
Síðast:
Þessi þáttur er í hlaðvarpi