Will Ferrell í Eurovision-veislu á RÚV í kvöld

Mynd með færslu
 Mynd: EPA-EFE - EPA

Will Ferrell í Eurovision-veislu á RÚV í kvöld

14.05.2020 - 10:57

Höfundar

Stórstjarnan Will Ferrell  mun koma fram í sjónvarpsþættinum Eurovisiongleði – Okkar 12 stig sem sýndur verður í beinni útsendingu á RÚV í kvöld kl. 19.40. Í þættinum gefst Íslendingum kostur á að kjósa hvaða land hefði fengið 12 stig frá Íslandi ef keppninni hefði ekki verið aflýst.

Ferrel er mikill Íslandsvinur og dvaldist nýverið hér á landi við tökur á Hollywood-myndinni Eurovision. Þar leikur hann Íslendinginn Lars sem keppir í Eurovision fyrir Íslands hönd. „Það er mikill heiður fyrir okkur að þessi heimsfrægi leikari gefi sér tíma til að taka þátt í þessu með okkur,“ segir Rúnar Freyr Gíslason verkefnastjóri hjá RÚV. „Honum þykir greinilega mjög vænt um Ísland og Íslendinga og hann segir að hann hafi notið þess að vera hérna. Hann sló allavega strax til þegar við höfðum samband við hann í gegnum Netflix.“

Rúnar Freyr segist ekki vilja gefa nánar upp hvaða hlutverki Will eigi eftir að gegna í þættinum í kvöld. „Ég hvet bara alla til að horfa, þetta verður æðislegt. Þrátt fyrir að engin verði Eurovision-keppnin í ár, þá hvetjum við alla til að koma sér í gírinn fyrir kvöldið með snakkið og ídýfuna og kjósa sitt uppáhaldslag.“

Í þættinum Okkar 12 stig í kvöld kýs þjóðin í símakosningu hvaða lag hefði fengið 12 stig frá Íslandi, hefði keppnin verið haldin. Rúnar Freyr lofar mikilli skemmtun. „Jón Jónsson og Ragnhildur Steinunn verða kynnar en svo koma fjölmargir aðrir fram. Það verður auðvitað kosið á milli 15 bestu laganna, Daði Freyr verður með geggjað atriði, Klemens Hatari sýnir á sér nýja hlið, ríkisstjórnin, forsetahjónin og fleiri koma við sögu og svo auðvitað Will Ferrell.“

Okkar 12 stig hefjast á RÚV í kvöld kl. 19.40.

Tengdar fréttir

Tónlist

Svona er að fara á stefnumót með Eurovision-kynni

Tónlist

Selma djammaði líkt og það væri 1999 í Vikunni

Tónlist

Íslendingar sætta sig ekki við að missa af Eurovision

Tónlist

Daði og Gagnamagnið á toppnum í Svíþjóð