Norðurland: 90% fyrirtækja í ferðaþjónustu opin í sumar

Mynd með færslu
 Mynd: RÚV - Ágúst Ólafsson
Eigendur fyrirtækja í ferðaþjónustu á Norðurlandi telja sig komast í gegnum það ástand sem kórónuveirufaraldurinn hefur skapað. Langflest fyrirtækin verða opin í sumar.

Þetta kemur fram í niðurstöðum könnunar sem Markaðsstofa Norðurlands hefur gert. Meirihluti þessarra fyrirtækja hefur nýtt sér úrræði ríkisstjórnarinnar og flest eru að nýta hlutabótaleiðina.

Mynd með færslu
 Mynd: Markaðsstofa Norðurlands

Alls sögðu tæplega 39% að mjög líklega myndi fyrirtækið þeirra lifa ástandið af og tæp 38% segja það frekar líklegt. Þegar spurt var hvort fyrirtækin yrðu opin í sumar svöruðu 91% játandi. Þar af ætla 60% að hafa opið allt árið og er opnunin því ekki aðeins bundin við háönnina næstu mánuði.

Þegar spurt hvar um hvort fólk í ferðaþjónustu væri sammála þeirri fullyrðingu að íslenskir ferðamenn væru mikilvægir fyrir þeirra fyrirtæki, taldi meirihlutinn svo vera. Alls sögðust tæp 36% mjög sammála þessari fullyrðingu og tæp 23% voru frekar sammála.