Athugið þessi frétt er meira en 1 ára gömul.

Landspítalinn rýmkar reglur um heimsóknir frá 18. maí

13.05.2020 - 13:49
Mynd með færslu
Hjúkrunarfræðingur að störfum Mynd: RÚV
Landspítalinn ætlar að rýmka reglur um heimsóknir á spítalann frá og með 18. maí. Spítalanum var lokað fyrir gestum þann 6. mars þegar kórónuveirufaraldurinn var að rísa hér á landi.

Farsóttarnefnd og viðbragðsstjórn spítalans ákvað í dag að frá 18. maí verði heimsóknir til sjúklinga í Fossvogi og við Hringbraut leyfilegar einum aðstandanda á milli klukkan 16 og 19. Heimilt verður að heimsækja inniliggjandi sjúkling í að hámarki eina klukkustund. Deildir verða opnar á þessum tíma, en starfsfólki er heimilt að vísa fólki frá ef fleiri en einn gestur mætir í heimsókn. Þó er fylgdarmaður undanskilinn.

Frá 18. maí verða heimsóknir á Landakoti og Vífilsstöðum leyfilegar einum aðstandanda milli klukkan 16 og 18, en þá í 30 mínútur að hámarki. Sama gildir um að starfsfólki er leyfilegt að vísa fólki frá ef fleiri en einn gestur mætir í heimsókn.  Aðstandendur eru beðnir um að hafa samband við ritara viðkomandi legudeildar og gera áætlun um heimsóknir.

Á Grensásdeild verða leyfðar heimsóknir eins aðstandanda í einu frá klukkan 16 til 18 eða 18 til 20.

Á líknardeild í Kópavogi verða leyfðar heimsóknir frá klukkan 13 til 20. Hver sjúklingur getur að hámarki fengið fjóra í heimsókn í einu.

Á geðdeildum við Hringbraut verða leyfðar heimsóknir eins í einu frá klukkan 16 til 19.

Á Kleppi verða heimsóknir í samráði við starfsfólk viðkomandi deildar og í Rjóðri verða heimsóknir í samráði við starfsfólk.