Opna nýja byggingavöruverslun á Hólmavík

04.05.2020 - 16:31
Mynd: Jóhannes Jónsson / RÚV
Hópur Strandamanna hefur komið sér saman um rekstur byggingavöruverslunar eftir að hafa séð fram á að þurfa að keyra í Borgarnes til að kaupa skrúfur.

Kaupfélag Steingrímsfjarðar á Hólmavík lokaði dyrum sínum í síðasta skipti í mars eftir meira en 120 ára starfsemi. Krambúðin hefur nú tekið við matvöruversluninni en út af stóð rekstur byggingavöruverslunarinnar í Pakkhúsinu. Rósmundur Númason, Hólmvíkingur, segir að án hennar þyrfti að leita langar leiðir að nauðsynjavörum.

„Þegar þessu yrði lokað þá sátum við uppi með það að þurfa leita annað. Til dæmis eins og það að þurfa að fara í Borgarnes til þess að kaupa skrúfur. Það er dálítið langsótt,“ segir hann.

Fljótt höfðu yfir fjörutíu manns slegist í hópinn með Rósmundi og fleirum. Til stendur að opna búðina að nýju upp úr mánaðamótum og nú er verið að endurskipuleggja hana, telja vörur og leita að starfskrafti.

Rósmundur segir þó að eftirsjá sé að Kaupfélagi Steingrímsfjarðar, sem var stofnað 1898 og rak á tímabili verslun á Hólmavík og eins á Drangsnesi og í Árneshreppi.

„Þetta var fyrirtæki í miklum blóma á tímabili. En svo náttúrulega bara fækkar fólkinu og hlutirnir breytast þannig að þetta er búið núna.“

Hann tekur þó undir að nú sé nýr kafli að hefjast.

„Já, nú erum við að skrifa nýja sögu í þennan kladda.“

elsamd's picture
Elsa María Guðlaugs Drífudóttir
Síðast:
Þessi þáttur er í hlaðvarpi