15 mánaða fangelsi fyrir skattsvik

Mynd með færslu
 Mynd: Kristinn Þeyr Magnússon - RÚV
Héraðsdómur Reykjaness dæmdi byggingaverktaka í gær til fimmtán mánaða fangelsisvistar, þar af eru tólf mánuðir skilorðsbundnir. Maðurinn var sakfelldur fyrir að standa ríkinu ekki skil á virðisaukaskatti sem hann innheimti af viðskiptavinum. Þetta er í annað skipti á þremur árum sem sami maður hlýtur dóm fyrir skattalagabrot, í fyrra skiptið fékk hann tólf mánaða skilorðsbundinn dóm.

Maðurinn var sakfelldur fyrir að hafa ekki staðið ríkinu skil á 8,7 milljóna króna virðisaukaskatti á árunum 2017 og 2018. Peningana nýtti hann í rekstur fyrirtækis síns.

Maðurinn rauf skilorð fyrri dóms og er sá dómur því reiknaður með í refsingu hans núna. Maðurinn hlaut tólf mánaða skilorðsbundinn fangelsisdóm í Hæstarétti árið 2017 en nú var hann dæmdur til fimmtán mánaða fangelsisvistar. Þar af falla tólf mánuðir niður ef hann heldur skilorð í þrjú ár frá uppkvaðningu dóms í gær. 

Brynjólfur Þór Guðmundsson
Fréttastofa RÚV
Síðast:
Þessi þáttur er í hlaðvarpi