Athugið þessi frétt er meira en 12 mánaða gömul.

Verðum að forða bakslagi í kynjajafnréttismálum

21.04.2020 - 13:30
Mynd með færslu
 Mynd: Guðmundur Bergkvist - RÚV
Katrín Jakobsdóttir, forsætisráðherra, tók í gær þátt í fjarfundi kvenleiðtoga um áhrif COVID-19 á jafnréttismál og stöðu kvenna. Á þriðja tug kvenna sem vinnur á vettvangi ríkisstjórna, alþjóðastofnana og frjálsra félagasamtaka tóku þátt í fundinum. 

„Það skiptir miklu máli að við séum með kynjasjónarmið að leiðarljósi í viðbrögðum okkar við Covid 19-faraldrinum og tryggjum að þessi kreppa valdi ekki bakslagi í kynjajafnréttismálum. Þess vegna skiptir máli að standa vörð um rétt allra til heilbrigðisþjónustu og berjast með öllum leiðum gegn kynbundnu ofbeldi,“ sagði Katrín á fundinum.

Meðal frummælenda voru auk forsætisráðherra, Phumzile Mlambo-Ngcuka, framkvæmdastjóri UN Women, Sahle-Work Zewde, forseti Eþíópíu, Marta Lucia Ramírez, varaforseti Kólombíu, Helen Dalli yfirmaður jafnréttismála hjá framkvæmdastjórn Evrópusambandsins og Tarana Burke aktífisti og stofnandi #MeToo hreyfingarinnar í Bandaríkjunum.

Mynd með færslu
 Mynd: Stjórnarráðið
Katrín Jakobsdóttir á fjarfundi kvenleiðtoga.

„Faraldurinn sýnir svo gjörla að ekki aðeins eru það konur sem eru í meirihluta þeirra sem standa vaktina í heilbrigðiskerfum heimsins heldur eru þær einnig líklegri til að sinna ólaunaðri umönnun veikra ættingja. Hér á Íslandi hefur faraldurinn sýnt okkur að við eigum sterkt umhyggjuhagkerfi og það er mikilvægt að standa vörð um það,“ sagði Katrín.

Kvenleiðtogarnir sem fundinn sátu voru allar sammála um nauðsyn þess að hvetja ríkisstjórnir og aðra til þess að huga að jafnréttissjónarmiðum í aðgerðum og ákvörðunum í tengslum við samfélags- og efnahagsleg áhrif heimsfaraldursins.