Athugið þessi frétt er meira en mánaðargömul.

Vilja vita um fjölda smita á heimilum fatlaðs fólks

17.04.2020 - 18:31
epa08345872 A health worker tests patients at a drive through testing service enabled at Rio Hortega Hospital in Valladolid, Spain, 06 April 2020. Spain faces the 23rd consecutive day of mandatory home confinement in a bid to slow down the spread of the pandemic COVID-19 disease caused by the SARS-CoV-2 coronavirus.  EPA-EFE/NACHO GALLEGO
 Mynd: EPA-EFE - EFE
Landssamtökin Þroskahjálp hafa óskað eftir upplýsingum um fjölda COVID-19-smita á sambýlum, búsetukjörnum og stofnunum þar sem fatlað fólk býr. Ef stjórnvöld hafa ekki safnað þess háttar upplýsingum óskar Þroskahjálp eftir að það verði gert. 

Í samningi Sameinuðu þjóðanna um réttindi fatlaðs fólks er mikil áhersla lögð á að fatlað fólk eigi að fá sömu heilbrigðisþjónustu og aðrir. Fatlað fólk á að njóta verndar og öryggis þegar hættuástand ríkir.

Þroskahjálp sendi erindið á félagsmálaráðuneytið, heilbrigðisráðuneytið, Gæða- og eftirlitsstofnun félagsþjónustu og barnaverndar, Samband íslenskra sveitarfélaga og Landlækni.

Á vef Þroskahjálpar kemur fram að ástæðan fyrir erindinu er einkum sú að í erlendum fjölmiðlum hefur komið fram að allt bendi til þess að COVID-19-smit séu mun útbreiddari meðal fatlaðs fólks og aldraðra sem dveljast á sambýlum, búsetukjörnum og stofnunum en á meðal fólks almennt.

 

Jón Hákon Halldórsson
Fréttastofa RÚV