Athugið þessi frétt er meira en 12 mánaða gömul.

Kosning um besta lagið á RÚV.is

Mynd með færslu
 Mynd: Mummi Lú

Kosning um besta lagið á RÚV.is

17.04.2020 - 13:18

Höfundar

Þrátt fyrir að Eurovision sem átti að fara fram í Rotterdam í maí hafi verið blásin af verður keppnin heiðruð á ýmsan hátt í mánuðinum. Íslendingar munu kjósa það lag sem hefði fengið tólf stig frá okkur þetta árið og fylgjast með Daða sigra hjörtu Evrópubúa í sérstökum Eurovision þætti á keppnisdag.

RÚV ætlar svo sannarlega að hita upp fyrir Eurovision-gleðina í maí. Upptakturinn að veislunni hefst annað kvöld í fyrsta þætti Alla leið þar sem Felix Bergsson og gestir hans fjalla þar um öll lögin sem valin voru til þátttöku í ár. Björg Magnúsdóttir fær gott fólk til að rifja upp skemmtilegar Eurovision-minningar og spjalla um keppnina fyrr og nú. Álitsgjafarnir verða á sínum stað og munu þau kveða upp dóm sinn um lögin og spá í hver hefði borið sigur úr býtum þetta árið.

Þriðjudaginn 28. apríl verður opnað fyrir kosningu á ruv.is/12stig. Þjóðin velur þar sín uppáhaldslög í Eurovision í ár og vega atkvæði hennar 50% á móti atkvæðum álitsgjafa þáttanna. Einkunnir álitsgjafanna og kosning áhorfenda á vefnum ráða því svo hvaða 15 lög fá að keppa í sérstöku Eurovision-partýi sem verður slegið upp í beinni útsendingu fimmtudaginn 14. maí. Það er einmitt kvöldið sem Daði Freyr átti að flytja framlag Íslands í ár, lagið Think About Things.

Í sérstökum þætti þann 12. maí verður því ljóstrað upp hvaða 15 lög þjóðin og álitsgjafar Alla leið völdu til að keppa í íslensku Eurovision-gleðinni – okkar 12 stigum sem verður á dagskrá 14. maí. Leikin verða brot úr lögunum 15, spáð í spilin og hitað upp fyrir fimmtudagskvöldið.

Vegleg Eurovision-veisla verður haldin fimmtudaginn 14. maí. Þar gefst þjóðinni kostur á að kjósa og komast þannig að því hvaða lag hefði fengið 12 stig frá Íslandi. Skemmtilegt Eurovision-kvöld fyrir alla fjölskylduna þar sem tónlist, sprell og gleði verða við völd. Góðir gestir koma í heimsókn og Daði og Gagnamagnið heilsa landsmönnum með skemmtilegum hætti. Gísli Marteinn Baldursson kynnir lögin 15 af sinni alkunnu snilld en gleðistjórarnir, og stjórnendur þáttarins, eru Jón Jónsson og Ragnhildur Steinunn Jónsdóttir.

Þátturinn Eurovision – Europe Shine a Light verður svo í beinni útsendingu frá EBU í frá Hollandi 16. maí og þar verður Daði okkar í aðalhlutverki ásamt öllum hinum listamönnunum, 41 talsins, sem valdir voru til þátttöku í Eurovision. Fulltrúar þjóðanna senda skemmtilegar myndbandskveðjur til áhorfenda og flytja saman þekkt Eurovisionlag á nýstárlegan hátt. Í þættinum verða sýnd brot úr öllum lögunum sem áttu að taka þátt í keppninni í ár og þekktar Eurovision-stjörnur koma við sögu svo fátt eitt sé nefnt.

Fréttin hefur verið uppfærð.

Tengdar fréttir

Tónlist

Íslendingar fá að kjósa sitt uppáhalds framlag

Tónlist

Daði: „Við hefðum náttúrulega 100% unnið þetta“

Popptónlist

Daða boðið að koma fram í Eurovision þætti á keppnisdag