Kolmunnaveiðin hafin af krafti suður af Færeyjum

17.04.2020 - 16:27
Mynd með færslu
 Mynd: Hlynur Ársælsson
Kolmunnaveiði á „gráa svæðinu“ svokallaða, á mörkum landhelgi Færeyja og Skotlands, er hafin af krafti. Um 15 íslensk kolmunnaskip hafa síðustu sólarhringa beðið eftir því að kolmunninn gangi inn á þetta svæði úr skosku lögsögunni.

Kolmunnaskipin köstuðu fyrst í gærkvöldi og fengu mörg hver góðan afla. Á heimasíðu Síldarvinnslunnar er haft eftir Gísla Runólfssyni, skipstjóra á Bjarna Ólafssyni AK, að þetta byrji vel. „Við köstuðum klukkan 10 í gærkvöldi austarlega á gráa svæðinu, drógum í 10 tíma og aflinn var 550 tonn,“ segir hann.

Veiðin hefst á svipuðum tíma og í fyrra

Gísli segir að allir séu glaðir um borð enda hafi áhöfnin beðið eftir því að veiðar hæfust. Þeir hafi farið frá Neskaupstað fyrir 10 dögum og hafa, eins og fleiri, beðið eftir að kolmunnin gengi úr skosku lögsögunni og inn á gráa svæðið. Og það sé að gerast á svipuðum tíma og á síðustu vertíð. „Mér sýnist að veiðin hafi byrjað 14. apríl í fyrra þannig að það munar ekki miklu. Við lítum bara á biðina eftir kolmunnanum sem góða sóttkví.“

„Mér líst afar vel á þetta“

Og Gísli segir að fleiri íslensk kolmunnaskip séu að fá mjög góðan afla. „Polar Amaroq hífði 620 tonn áðan og ég held að Víkingur hafi verið með 580 tonn. Beitir NK hífði í nótt tæplega 200 tonn eftir að hafa dregið stutt og Margrét EA var líka kominn með afla. Mér líst afar vel á þetta. Útlitið er býsna bjart og ég held að þetta verði bara vaxandi,“ segir hann.

 

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi