Fólki utan EES og EFTA áfram óheimilt að koma

Lögreglumaður með grímu fyrir vitum að taka á móti farþegum úr flugi frá Veróna.
 Mynd: Grímur Jón Sigurðsson
Dómsmálaráðherra hefur tilkynnt að ferðatakmarkanir sem tóku gildi þann 20. mars verði framlengdar til 15. maí. Umfang takmarkananna er óbreytt og verður því útlendingum, sem hvorki eru EES- né EFTA-borgarar, áfram óheimilt að koma til landsins nema þeir geti sýnt fram á að för þeirra sé vegna brýnna erinda.

Þetta kemur fram í tilkynningu á vef Stjórnarráðsins. Ríkisborgarar Schengen-svæðisins og aðstandendur þeirra munu áfram geta komið óhindrað inn á svæðið og er sérstaklega kveðið á um að útlendingar sem hafa dvalar- eða búseturétt innan svæðisins eigi einnig rétt á að koma. 

Þá eru ákveðnar starfsstéttir undanþegnar takmörkunum, til að mynda starfsfólk á sviði heilbrigðisþjónustu og þeir sem sinna farmflutningum.

Framkvæmdastjórn Evrópusambandsins gaf út tilmæli þann 8. apríl til aðildarríkja sambandsins og Schengen samstarfsins um að draga áfram úr ferðum fólks inn á Schengen svæðið til 15. maí í því skyni að hægja á útbreiðslu kórónaveirunnar. Nauðsynlegt sé þannig að framlengja þær aðgerðir sem þegar hefur verið gripið til svo að hægt sé að ná stjórn á útbreiðslu COVID-19. Þær aðgerðir nái aðeins tilgangi sínum að öll aðildarríki taki þátt og að gildistími takmarkananna sé hinn sami.

Dómsmálaráðherra sagði á blaðamannafundi stjórnvalda á þriðjudag þegar tilkynnt var um rýmkun á samkomubanni, að íslensk stjórnvöld myndu fylgja þessum tilmælum og nú hefur það formlega verið tilkynnt.

Íslendingar sem koma til landsins þurfa áfram að fara í tveggja vikna sóttkví við heimkomu.

andriyv's picture
Andri Yrkill Valsson
Fréttastofa RÚV
Síðast:
Þessi þáttur er í hlaðvarpi