Athugið þessi frétt er meira en mánaðargömul.

Ferðumst innanhúss – nýtt lag

08.04.2020 - 10:54
Mynd:  / 
Lagið Ferðumst innanhúss var frumflutt í umræðuþætti um COVID-19 fyrir ungt fólk á RÚV. Það er hægt er að spila myndbandið með laginu með því að smella á örina á myndinni hér fyrir ofan.

Íslendingar hafa sameinast í baráttunni gegn COVID-19 og enn er að minnsta kosti mánuður eftir af þeim slag. Nú er þegar farið að hægjast á útbreiðslu kórónuveirunnar. Samt er mjög mikilvægt að gleyma sér ekki um páskana og halda áfram að fara eftir fyrirmælum Almannavarna og hlýða Víði.

Til þess að undirstrika það hefur landslið tónlistarfólks, ásamt þríeykinu vinsæla, Ölmu, Víði og Þórólfi, sent frá sér myndband við lagið „Ferðumst innanhúss“. Lagið er gamalt og við þekkjum það betur undir nafninu „Góða ferð“. Leifur Geir Hafsteinsson bjó til nýjan texta við lagið. Allir sem unnu við lagið gerðu það frítt.

Leifur Geir samdi textann í mars og birta myndband af sér og Kristjáni Steini, syni sínum, að flytja lagið. Þá fór boltinn að rúlla. Honum datt í hug að fá hóp af úrvals tónlistarfólki í lið með sér. Svo hringdi hann í Halldór Gunnar Pálsson, í Fjallabræðrum, og bað hann að gera þetta með sér. Þeir hafa unnið nótt og dag við að púsla öllu saman svo hægt væri að gefa lagið út í dag. 

Samkomubannið kom í veg fyrir að tónlistarfólkið gæti verið saman að taka upp lagið. Þess vegna voru þau öll hvert í sínu horni og tóku upp á snjallsímann sinn.

Hér er textinn að laginu svo það geta allir sungið með.

Ferðumst innanhúss

Þú veist það eru viðsjárverðir tímar
með landamæri lokuð víðast hvar
en sútum ekki örlög, heldur húkkum okkur far
í ferðalag og freistum gæfunnar                                

Góða ferð, góða ferð, góða ferð
þetta‘er tækifæri‘af allra bestu gerð
já tínum til vort trúss og ferðumst innanhúss
góða ferð, verum sæl með góða ferð                                           

Í tveggja metra fjarlægð kæri vinur
og ekki fleiri‘en nítján á sama stað
í takmörkunum lífsins þá líst mér best á það
að bregða mér í ilmolíubað                                                               

Góða ferð, góða ferð, góða ferð
þetta‘er heima-spa af allra bestu gerð
ohh við elskum svona stúss, að dúllast innanhúss
góða ferð, verum sæl með góða ferð                                           

Ef leiðigjörn er orðin blessuð stofan
og eldhúsið svo hversdagslegt og grátt
þá ævintýrin bíða, það toppar enda fátt
góða bílskúrsútilegu, yfir nátt                                                          

Góða ferð, góða ferð, góða ferð
þetta‘er útilega af allra bestu gerð
já tínum til vort trúss og kúrum innanhúss
góða ferð, verum sæl með góða ferð                                           

Nú þurfa allir þétt að standa saman
og koma COVID-stríðinu á skrið
ef efla viljum lýðheilsu og finna sálarfrið
við hlýðum Víði og ferðumst heima við!                 

Góða ferð, góða ferð, góða ferð
þetta‘er upplifun af sérstökustu gerð
já, fáum úr því rúss, að ferðast innanhúss
góða ferð, verum sæl með góða innanhússferð
góða ferð, verum sæl með góða ferð

orrifr's picture
Orri Freyr Rúnarsson