Athugið þessi frétt er meira en 1 ára gömul.

Andlát í Bolungarvík af völdum COVID-19

06.04.2020 - 10:20
Mynd með færslu
 Mynd: flickr.com
Íbúi á hjúkrunarheimilinu Bergi í Bolungarvík lést í gær úr COVID-19. Þetta kemur fram í tilkynningu Heilbrigðisstofnunar Vestfjarða á Facebook. Þetta er sjötta andlátið hér á landi vegna kórónuveirunnar.

Samkvæmt fréttamiðlinum BB.is hét maðurinn Gunnsteinn Svavar Sigurðsson og var fæddur 1938.

Á Bergi eru tveir sýktir af COVID-19 og þrír íbúar í einangrun og búið að taka sýni. Fimm íbúar eru í sóttkví án einkenna.

Meirihluti fastra starfsmanna á hjúkrunarheimilinu eru í einangrun, þar af fimm með staðfest smit. Aðrir fastir starfsmenn utan þriggja eru í sóttkví og er heimilinu því sinnt nær eingöngu af fólki úr bakvarðarsveit eða öðrum deildum stofnunarinnar. Von er á auknum liðsafla með þyrlu seinna í dag.