Samkeppni um útilistaverk í Vesturbæ Reykjavíkur

Drónamyndir.
 Mynd: RÚV

Samkeppni um útilistaverk í Vesturbæ Reykjavíkur

04.04.2020 - 09:33

Höfundar

Reykjavíkurborg hefur efnt til samkeppni um gerð útilistaverks í Vesturbæ Reykjavíkur. Samkeppnin er haldin í kjölfar íbúakosningar í verkefninu Hverfið mitt 2020. Á meðal þess sem Vesturbæingar kusu var að halda samkeppni um gerð útilistaverks í hverfinu. 

„Markmið þess að koma listaverki fyrir í Vesturbænum er að auðga mannlífið og fegra eða virkja vannýtt svæði. Kallað er eftir fjölbreyttum hugmyndum um leið og horft verður til þess að listaverk hafi margbreytilega virkni, sé notið af ólíkum aldurshópum eða tengist sögu svæðisins,“ segir í tilkynningu frá Listasafni Reykjavíkur.

Þeir sem hafa áhuga á að vinna verkið eru beðnir um að senda inn nafnlausa tillögu þar sem fram kemur stutt lýsing á hugmyndinni að baki, efnisval og kostnaðaráætlun. Kostnaður við verkið og uppsetningu þess má ekki fara yfir 10 milljónir króna. 

Tillögum skal skilað fyrir 21. maí. Niðurstöður dómnefndar verða kynntar í síðasta lagi 22. júní og áætlað er að uppsetningu verksins ljúki á þessu ári.