Athugið þessi frétt er meira en 2 ára gömul.

Fyrsti fjarfundurinn í 70 ára sögu NATO

02.04.2020 - 21:50
Erlent · Innlent · COVID-19 · NATO
Mynd með færslu
 Mynd: Stjórnarráðið
Viðbrögð Atlantshafsbandalagsins við COVID-19 faraldrinum voru aðalefni fundar utanríkisráðherra þess sem fór fram í dag. Fundurinn var haldinn í gegnum fjarfundabúnað og er það í fyrsta sinn í 70 ára sögu bandalagsins sem fundað er með þessum hætti, samkvæmt tilkynningu á vef Stjórnarráðsins.

Ráðherrarnir ræddu hvernig bandalagið geti frekar stutt við samhæfingu og aðstoð vegna neyðarviðbragða við faraldrinum. Ýmis bandalagsríki hafa veitt hvort öðru neyðaraðstoð og meðal annars nýtt til þess viðbúnað og sameiginlega flutningsgetu sem bandalagsríki búa yfir. Þá hefur liðsafli ýmissa ríkja stutt við borgaraleg neyðarviðbrögð, meðal annars með uppsetningu á hersjúkrahúsum og við landamæragæslu.

Guðlaugur Þór Þórðarson utanríkisráðherra segir að það hafi verið gagnlegt að bera saman bækur í hópi bandalagsríkja og ræða þær áskoranir sem ríki heims standi nú frammi fyrir. 

„Ég fagna því að það kom fram ríkur vilji til að gera enn betur í að virkja þann viðbúnað og getu sem Atlantshafsbandalagið býr yfir við neyðaraðstæður eins og nú ríkja“ segir Guðlaugur. Hann segir ríkin sammála um að við aðstæður sem þessar þurfi bandalagið einnig að hafa viðnámsþrótt til að sinna áfram kjarnaverkefnum sínum á sviði sameiginlegra varna.

Fundurinn í dag var einnig sögulegur þar sem Norður-Makedónía tók nú þátt í fyrsta sinn sem fullgilt bandalagsríki. Aðild landsins gekk í gildi 27. mars síðastliðinn og er Norður-Makedónía þrítugasta aðildarríki Atlantshafsbandalagsins.