Athugið þessi frétt er meira en 1 ára gömul.

Gjástykki friðlýst gegn orkuvinnslu

01.04.2020 - 21:33
Mynd með færslu
 Mynd:
Guðmundur Ingi Guðbrandsson, umhverfis- og auðlindaráðherra, undirritaði í dag friðlýsingu Gjástykkis í samræmi við lög um verndar- og orkunýtingaráætlun. Þetta er fyrsta friðlýsing háhitasvæðis í verndarflokki rammaáætlunar.

Í tilkynningu á vef Stjórnarráðsins kemur fram að Gjástykki þyki einstætt á heimsvísu út frá jarðfræðilegu sjónarmiði því þar má sjá hvernig land hefur gliðnað með tilheyrandi sigdæld, sprungum og misgengjum. Á svæðinu er að mestu leyti nýbrunnið og lítt gróið hraun sem runnið hefur á nútíma, m.a. frá Kröflueldum 1975-1984. 

Í rökstuðningi verkefnastjórnar rammaáætlunar fyrir flokkun svæðisins í verndarflokk og friðlýsingu þess kemur fram að Gjástykki er hluti af eldstöðvakerfi Kröflu sem hefur verndargildi á heimsmælikvarða. Svæðið liggi í nágrenni náttúruminja með hátt verndargildi sem eigi að njóta friðunar. Þannig veiti líka einstakar jarðmyndanir í Gjástykki tækifæri til uppbyggingar þekkingar og fræðslutengdrar ferðaþjónustu.

Friðlýsingin Gjástykkis gegn orkuvinnslu er hluti af friðlýsingaátaki sem umhverfis- og auðlindaráðherra ýtti úr vör árið 2018. Með friðlýsingunni er Gjástykki verndað gegn orkuvinnslu yfir 50MW í varmaafli en þar voru uppi hugmyndir um jarðvarmavirkjun. Friðlýsingin nær ekki til annarra þátta en orkuvinnslu.

Umhverfis- og auðlindaráðherra á von á að friðlýsa fleiri svæði úr rammaáætlun á næstu mánuðum.