Þættir úr sögu nútímans

1. hluti: Austur fyrir járntjaldið

Í fyrsta hluta viðtalsins förum við yfir æviferil félagsfræðingsins og heimspekingsins Jóhanns Páls Árnasonar. Við ræðum æskuárin á Dalvík á fimmta og sjötta áratugnum, mótunarárin þegar hann fór sem ungur róttæklingur austur til Tékkóslóvakíu á tímum lýðræðislegra umbótatilrauna sem kallaðar voru Vorið í Prag. Við ræðum námið við hinn þekkta Frankfúrt-skóla þar sem Jóhann skrifaði doktorsverkefni hjá þýska heimspekingnum Jürgen Habermas og svo vegferð hans til Ástralíu þar sem hann starfaði sem prófessor í rúma þrjá áratugi.

Frumflutt

14. júlí 2025

Aðgengilegt til

Rennur ekki út

Um áratugaskeið var Jóhann Páll Árnason prófessor í félagsfræði í Ástralíu. Rannsóknir Jóhanns Páls spanna hnöttinn þveran og endilangan. Hann hefur skrifað ítarlega um þróun japansks samfélags, skrifað um sovésku leiðina til nútímans, um Evrópu, Íslam, og Kína svo eitthvað sé nefnt. Hann beitir tækjum sagnfræði, félagsfræði og heimspeki til að greina ólíkar leiðir mismunandi menningarheima til nútímans.

Þættir í sögu nútímans er viðtalaröð í fjórum hlutum þar sem Kristján Guðjónsson og Guðmundur Ævar Oddsson, prófessor við Háskólann á Akureyri, ræða við Jóhann Pál um æviferil hans og rannsóknir, um sögulega félagsfræði og ástand heimsins í dag.