Verksmiðja í Svartsengi gæti framleitt umhverfisvænt eldsneyti fyrir allan fiskiskipaflotann segir talsmaður Carbon Recycling International. Áhugann vantar hins vegar í hópi kaupenda. Þess vegna liggur öll framleiðsla niðri. Engu að síður skilaði fyrirtækið hagnaði í fyrra og er það vegna áhuga í Kína og Noregi á tækniþekkingunni hér á landi.

Framkvæmdastjóri þróunar og nýsköpunar hjá Orkuveitu Reykjavíkur segir að hver kona og maður sjá að ferlið í kringum rammaáætlun virki alls ekki. Það verði að grípa í taumana. Vegna tafa á afgreiðslu 3. áfanga áætlunarinnar er ekki hægt að rannsaka þá kosti sem eru heimilaðir í henni en hafa ekki verið samþykktir á Alþingi. Töfin sé byrjuð að standa starfseminni fyrir þrifum.

Framleiðsla á rafmagni er hafin á Flúðum í fyrstu svokölluðu lágvarmavirkjuninni. Með nýrri tækni er nú hægt að virkja lágvarma til orkuframleiðslu. Í Kópsvatnsvirkjun í Hrunamannahreppi er umframvarmi úr borholu nýttur til framleiðslu rafmagns, vatnið úr holunni er um 120 gráður.

Mengun vegna brennisteinsvetnis á höfuðborgarsvæðinu hefur minnkað verulega er liðið hefur á daginn. Klukkan hálf tíu í morgun var styrkur brennisteinsvetnis við Eiríksgötu og á Grensásvegi í Reykjavík um og yfir 50 míkrógrömm á rúmmetra. Heilsuverndarmörk eru 50 míkrógrömm að meðaltali yfir heilan sólarhring. Síðdegis er útlit fyrir að bæti í vind, að sögn Elínar Bjarkar Jónasdóttur, veðurfræðings á Veðurstofu Íslands. Í kvöld verði vindur á Hellisheiði 10-12 metrar á sekúndu.