Á Sjúkrahúsinu á Akureyri liggur enginn covid-sjúklingur inni og hefur ekki gert í tvær vikur. Aðal áskorunin er að manna stöður sjúkrahússins vegna einangrunar og sóttkvíar starfsfólks. Gjörgæsluhjúkrunarfræðingar frá Sjúkrahúsinu á Akureyri hafa þó undanfarnar vikur fært sig yfir á Landspítalann til að létta undir þar.

Töluvert er um að fólk sem kemur frá útlöndum til að vinna hérlendis sé óbólusett og verði mikið veikt af covid. Deildarstjóri covid-göngudeildar segir mikið álag á deildinni.

Verkefnastjóri farsóttarnefndar Landspítala segir til skoðunar að færa spítalann aftur á hættustig. Hún kallar eftir hertum sóttvarnaaðgerðum, að minnsta kosti grímuskyldu. 

Í gær greindust 66 COVID-19 smit innanlands og var meirihluti þeirra utan sóttkvíar, eða um 52%. Frá mánudegi hafa greinst 291 smit innanlands. Sjö fullorðnir liggja nú inni á Landspítala með veiruna, en enginn þeirra er á gjörgæslu. Meðalaldur sjúklinganna er 49 ár. Í COVID göngudeild Landspítalans voru skráðir í morgun 654 sjúklingar, þar af 189 börn. Nýskráðir í gær voru 51 fullorðinn og 19 börn. Frá upphafi fjórðu bylgju faraldursins hafa verið 129 innlagnir á spítalann vegna veirunnar.

Landspítali hefur sent starfsmannaleigum í Evrópu fyrirspurnir og óskað eftir íslensku heilbrigðisstarfsfólki og þá sérstaklega sérhæfðum hjúkrunarfræðingum. Auk þess er til skoðunar að ráða erlenda heilbrigðisstarfsmenn.

Iðulega eru allar sjúkrastofur á covid-göngudeild Landspítalans fullnýttar. Hún hefur verið sérútbúin fyrir sjúklinga með veiruna þannig að þeir ganga beint inn í sjúkrastofurnar og fara aldrei inn á deildina sjálfa. Hjúkrunarfræðingur segir að erfitt geti verið að sinna sjúklingum í sveittum hlífðarfatnaðinum, sem hún þarf stundum að klæða sig í 25 sinnum á dag.

„Staðan á Landspítala nálgast neyðarástand núna“ sagði Tómas Guðbjartsson hjartaskurðlæknir á Landspítalanum í síðdegisútvarpinu á Rás 2 í gær. Spurður um muninn á veikindum Covid smitaðs fólks í þessari bylgju samanborið við fyrri bylgjur, sagði Tómas veikindin mjög svipuð og inniliggjandi sjúklingar væru margir mjög veikir.

Álag vegna faraldursins veldur því að helmingi færri skurðstofur eru í rekstri núna en í venjulegu ári á Landspítalanum. Yfirmaður farsóttarnefndar segir það matsatriði hvenær of langt sé gengið á aðra starfsemi spítalans.

Sólveig Gylfadóttir, hjúkrunarfræðingur á smitsjúkdómadeild Landspítala segir nýleg dæmi um að fólk hafi hætt vegna álags og manneklu. Sjálf hlýddi hún kallinu og mætti á vaktina þrátt fyrir að vera í fæðingarorlofi. Hún segir að oft á tíðum sé öryggi sjúklinga og starfsfólks ekki tryggt.

Deildarstjóri covid-göngudeildarinnar segir að bregðast þurfi við langvarandi manneklu á spítalanum. Starfsfólk sem hafi verið kallað úr sumarfríi til að sinna fjórðu bylgjunni sé orðið langþreytt. Tveir covid smitaðir voru lagðir inn á spítalann í dag.

Yfirlögregluþjónn hjá almannavörnum segir mesta áherslu nú lagða á að koma útsettum í sóttkví. Í gær greindust 76 smituð af COVID-19, 54 þeirra teljast fullbólusett. Smit eru dreifð um allt land, sem er ólíkt fyrri bylgjum faraldursins.

Álagið á Covid-göngudeild Landspítalans hefur aukist mikið síðustu daga eftir að innanlandssmitum tók að fjölga á ný. Yfirmaður deildarinnar telur þó ekki ástæðu til að herða sóttvarnaraðgerðir. Farsóttarhúsið við Rauðarárstíg í Reykjavík er við það að fyllast.