Færslur: Alþjóðamál

Heræfingar Bandaríkjamanna og Suður-Kóreu hefjast í dag
Árlegar, sameiginlegar heræfingar Bandaríkjanna og Suður-Kóreu hefjast í Suður-Kóreu í dag, samkvæmt tilkynningu varnarmálaráðuneytisins í Seúl. Markmið æfinganna er sagt að efla og samræma viðbrögð við mögulegum kjarnorku- og eldflaugatilraunum og jafnvel árásum Norður-Kóreumanna.
Indland í kröppum sjó vegna ummæla um spámanninn
Ummæli talskonu forsætisráðherra Indlands og flokks hans um spámanninn Múhameð hafa valdið óeirðum innan Indlands og utan og fjöldi ríkja þar sem Íslamstrú er í hávegum höfð hefur kallað sendiherra sína heim frá Indlandi vegna þeirra.
12.06.2022 - 07:30
Biden: Zelensky „vildi ekki heyra“ viðvaranir um innrás
Joe Biden Bandaríkjaforseti segir að Volodymyr Zelensky, forseti Úkraínu, hafi „ekki viljað heyra“ viðvaranir Bandaríkjamanna í aðdraganda innrásar Rússa í Úkraínu. Það eigi líka við um marga fleiri, sagði forsetinn, sem segist hafa ákveðinn skilning á því að menn hafi ekki viljað heyra þessar viðvaranir.
Ástralía
Milljarðabætur vegna samningsrofs við kafbátaverksmiðju
Áströlsk stjórnvöld tilkynntu í morgun að þau hefðu náð samkomulagi við franska stórfyrirtækið Naval Group um bætur fyrir að hafa rift samningi sínum við fyrirtækið um smíði fjölda dísilknúinna kafbáta fyrir ástralska flotann. Anthony Albanese, forsætisráðherra Ástralíu, sagði stjórnendur Naval Group hafa samþykkt „sanngjarna og réttláta sátt“ um 555 milljónir evra, jafnvirði 77 milljarða króna, í bætur fyrir riftun samningsins, sem hljóðaði upp á margfalt hærri upphæð.
Zelensky harðorður í garð Vesturlanda
Volodymyr Zelensky Úkraínuforseti var að venju ómyrkur í máli í daglegu sjónvarpsávarpi sínu í gærkvöld, þar sem hann snupraði Vesturlönd fyrir að gera allt of lítið til að hjálpa Úkraínu til sigurs í stríðinu við innrásarher Rússa, sem sækir þessa dagana af miklum þunga að nokkrum mikilvægum borgum á Donbas-svæðinu í austurhluta landsins.
Danska þingið herðir varnir gegn rafrænum njósnum
Tölvudeild danska þingsins uppfærir og styrkir öryggisbúnað í símum þingmanna til að verja þá fyrir óprúttnum aðilum sem reynt gætu að koma njósnaforritum í símana og hafi jafnvel gert það nú þegar. Danska blaðið Jyllands-Posten greindi frá þessu í gær og sagði verið að verja símana gegn ísraelska njósnaforritinu Pegasus, sem meðal annars var notað til að njósna um Emmanuel Macron Frakklandsforseta og fleiri háttsetta stjórnmálamenn, blaðamenn, mannréttindafrömuði og aktívista víða um heim.
26.05.2022 - 05:48
Öryggisráð Sameinuðu þjóðanna
Vilja frekari refsiaðgerðir gegn Norður Kóreu
Öryggisráð Sameinuðu þjóðanna fundar í dag og greiðir að líkindum atkvæði um ályktun um hertar refsiaðgerðir gegn Norður Kóreu vegna nýlegra tilrauna þeirra með langdrægar eldflaugar. Bandaríkin gegna formennsku í ráðinu um þessar mundir. Framlögð ályktun er frá þeim komin og fulltrúi þeirra setti atkvæðagreiðsluna um hana á dagskrá ráðsins seinni partinn í dag, samkvæmt ónefndum heimildarmönnum innan ráðsins.
Sakar Evrópuríki um tvöfeldni í málefnum flóttafólks
Skjót viðbrögð, opin landamæri og hlýjar móttökur sem þær milljónir Úkraínumanna sem flúið hafa innrás Rússa og hernað í heimalandi þeirra eru fagnaðarefni, sem afhjúpa um leið tvískinnung Evrópusambandsríkja í málefnum flótta- og förufólks, segir forseti Alþjóðasambands Rauða krossins og Rauða hálfmánans. Munurinn á þessu og þeirri höfnun og útilokun sem mætir fólki sem þangað flýr undan ofbeldi og átökum í Afríku, Mið-Austurlöndum og annars staðar í heiminum sé sláandi.
Rússar skrúfa fyrir gasið til Póllands og Búlgaríu
Rússneski orkurisinn Gazprom tilkynnti í kvöld að það muni hætta útflutningi á gasi til Póllands og Búlgaríu frá og með morgundeginum. Stjórnendur fyrirtækisins tilkynntu stjórnendum pólska ríkisorkufyrirtækisins PGNiG að skrúfað yrði fyrir Yamal-gasleiðsluna frá Rússlandi til Póllands. Búlgarska ríkisorkufyrirtækinu Bulgargaz barst sambærileg tilkynning í kvöld.
Ísland mun styðja umsókn Finna um aðild að NATO
Ísland mun styðja aðildarumsókn Finna, sæki þeir um aðild að Atlantshafsbandalaginu eins og rætt hefur verið um að undanförnu. Þetta segir Þórdís Kolbrún Reykfjörð Gylfadóttir utanríkisráðherra í samtali við Morgunblaðið. Hún segir að af orðfæri Vladimírs Pútíns Rússlandsforseta megi ráða „að honum væri það ekki að skapi ef Finnar tækju ákvörðun um að óska eftir aðild að bandalaginu.“
ESB boðar aðgerðir gegn stærsta banka Rússlands
Framkvæmdastjórn Evrópusambandsins boðar fleiri refsiaðgerðir gegn Rússum og rússneskum fyrirtækjum. Nýjustu aðgerðunum verður beint sérstaklega gegn rússneskum bönkum og olíuiðnaðinum, að sögn Ursulu von der Leyen, forseta framkvæmdastjórnarinnar. „Við höldum áfram að beita okkur gegn bankageiranum, sérstaklega Sberbank, sem er með 37 prósenta markaðshlutdeild í rússneska bankageiranum,“ sagði von der Leyen í samtali við þýska blaðið Bild am Sonntag, „og svo er það auðvitað orkugeirinn.“
Enn fjölgar fyrirtækjum sem hætta starfsemi í Rússlandi
Greiðslukortarisarnir Visa og Mastercard tilkynntu á laugardag að þau ætli að hætta allri starfsemi í Rússlandi. Þar með bætast þau í stóran og vaxandi hóp bandarískra og evrópskra fyrirtækja, sem hafa hætt starfsemi og viðskiptum í og við Rússland eða boðað slíka stöðvun vegna innrásar Rússa í Úkraínu.
Bandarískur olíurisi hættir allri starfsemi í Rússlandi
Bandaríski olíurisinn ExxonMobil tilkynnti á þriðjudag að fyrirtækið ætli að draga sig út úr samstarfi nokkurra stórfyrirtækja, meðal annars frá Rússlandi, Indlandi og Japan, um olíuvinnslu á stóru olíuvinnslusvæði í Rússlandi. Ástæðan er innrás Rússa í Úkraínu, segir í tilkynningu fyrirtækisins. Þar kemur fram að ExxonMobil sé byrjað að leggja drög að því að hætta þátttöku í rekstri Shakalin-1 olíuvinnslusvæðisins.
70 prósenta verðbólga á Kúbu
Verðbólga á Kúbu verður um 70 prósent á árinu sem er að líða, sem er með því mesta sem þekkist í heiminum. Alejandro Gil, ráðherra efnahagsmála í Kúbustjórn, greindi frá þessu í gær og sagði þetta með ráðum gert og lið í nýrri peningastefnu stjórnvalda. Kúbustjórn hækkaði almennt verðlag í landinu um 44 prósent í ársbyrjun og sagði það lið í áætlun stjórnvalda sem miðaði að því að hækka laun landsmanna um 450 prósent.
Spegillinn
Ísland geti upprætt ríkisfangsleysi fyrst Evrópulanda
Ísland gæti orðið fyrsta landið í Evrópu til þess að uppræta ríkisfangsleysi með öllu. Þetta er mat Flóttamannastofnunar Sameinuðu þjóðanna. Hér dvelja nú 52 manneskjur án ríkisfangs. Talskona stofnunarinnar á Norðurlöndum og í Eystrasaltslöndunum segir mikilvægt að tryggja betur réttindi ríkisfangslausra barna á Íslandi. 
Enn er kosið um sjálfstæði Nýju Kaledóníu
Kjósendur á Nýju Kaledóniu, eyjaklasa sem enn lýtur frönskum yfirráðum, greiða um það atkvæði í dag, hvort eyjarnar eigi að verða sjálfstætt ríki eða tilheyra Frakklandi áfram. Er þetta þriðja þjóðaratkvæðagreiðslan um sjálfstæði eyjanna á fjórum árum. Er henni jafnframt ætlað að vera sú síðasta, að minnsta kosti um alllanga hríð, og skapa sátt og frið á eyjunum, þar sem hart hefur verið deilt um þetta mál áratugum saman.
12.12.2021 - 02:40
Bandaríkjastjórn
Vara Kínverja við að beita Taívan hótunum og þrýstingi
Bandaríkjastjórn varar stjórnvöld í Peking við því að beita Taívan frekari þrýstingi og hótunum. Þetta kemur fram í tilkynningu frá bandaríska utanríkisráðuneytinu, aðeins tveimur dögum fyrir fyrsta fund forseta stórveldanna tveggja, sem beðið er með talsverðri eftirvæntingu.
14.11.2021 - 04:27
Biden og Xi ræðast við á mánudagskvöld
Forsetar Bandaríkjanna og Kína, þeir Joe Biden og Xi Jinping, hafa mælt sér mót á fjarfundi á mánudag. Skrifstofa bandaríska forsetaembættisins í Hvíta húsinu staðfesti þetta í gærkvöld. Verða þetta fyrstu milliliðalausu viðræður leiðtoganna frá því að Biden tók við forsetaembættinu vestra í janúar.
13.11.2021 - 05:49
Fréttaskýring
Liggur styrkur Parísarsamkomulagsins í veikleikum þess?
Parísarsamningurinn er langtímasamningur sem viðurkennir að heimurinn er á byrjunarreit, þetta segir sérfræðingur í loftslagsrétti. Samningurinn hefur verið gagnrýndur fyrir veikar lagalegar skuldbindingar en reynslan sýnir að hjá ríkjum heims er lítil stemmning fyrir strangari kvöðum. Burt séð frá öllu bla, bla, bla-i kann að vera að helsti styrkur samningsins liggi í hversu lítið það bindur hendur aðildarríkja.
Fréttaskýring
Segir grænþvott þróunaraðstoðar ekki vandamál hér
Utanríkisráðherra segir Ísland standa vel þegar kemur að framlögum til loftslagsaðgerða og aðlögunar í þróunarríkjum.  Þróunarsamvinnunefnd OECD, telji Ísland standa sig betur en flest önnur ríki á þessu sviði. Hlutfall loftslagstengdra verkefna af heildarþróunarsamvinnu hefur hækkað en ráðherra segir grænþvott þróunaraðstoðar ekki vandamál hér. Þá sé gagnrýni sjálfstæðra rannsóknastofnana á framlag Íslands hvatning til að gera betur.
Fréttaskýring
Telja fjárstuðning Íslands ekki í takt við ríkidæmið
Síðastliðin fjögur ár hefur Ísland varið samtals 133 milljónum króna til Græna loftslagssjóðsins. Tvær sjálfstæðar rannsóknarstofnanir hafa komist að þeirri niðurstöðu að loftslagsstuðningur Íslands við fátækari ríki sé langt frá því að teljast sanngjarn í ljósi ríkidæmis landsins og ábyrgðar. 
Spegillinn
COP26: Óreiða, togstreita og öll dýrin í skóginum
Loftslagsráðstefnan í Glasgow er formlega farin af stað. Óreiða einkenndi ráðstefnuvettvanginn í morgun en eftir hádegi fóru ráðamenn að viðra stefnumálin. Spegillinn ræddi við Tinnu Hallgrímsdóttur, formann Ungra umhverfissinna um upplifun hennar af fyrsta ráðstefnudeginum og velti því upp hvort hin margslungna COP26 ætti hugsanlega eitthvað skylt við þekkt barnaleikrit.
Vill að stjórnvöld setji atvinnugeirum skýr losunarmörk
Framkvæmdastjóri Landverndar segir ríkisstjórnina ekki hafa gripið til alvöru loftslagsaðgerða sem taki beint á losun gróðurhúsalofttegunda. Ísland sé langt frá því að vera í fararbroddi í loftslagsmálum.  Þrenn umhverfisverndarsamtök skora á stjórnvöld, í aðdraganda loftslagsráðstefnunnar í Glasgow,að setja sér markmið um 70% samdrátt í losun fyrir árið 2030. 
Fréttaskýring
Þarf tífalt meiri samdrátt en COVID olli
Nýjar landsáætlanir þjóða heims í loftslagsmálum duga ekki til, eigi markmið Parísarsamkomulagsins að nást. Sé núverandi markmiðum fylgt má gera ráð fyrir að losun minnki um tæp 8% fyrir árið 2030, en hún þarf að minnka um að minnsta kosti þriðjung og helst helming til að ná 1,5 gráðu markmiðinu. Það kostar tífalt meiri samdrátt en kórónuveirufaraldurinn olli árið 2020.
Óttast að Glasgow-borgar bíði alþjóðleg niðurlæging
Nokkrar efasemdir virðast uppi um að Glasgow, stærsta borg Skotlands, ráði fyllilega við það verkefni að halda 26. loftslagsráðstefnu Sameinuðu þjóðanna, sem hefst í lok mánaðarins. Ónógt gistipláss, rottuplága og boðað verkfall lestarstarfsmanna er meðal þess sem kann að setja strik í reikninginn.