Þrjár vikur sléttar eru í dag frá því að Grindavíkurbær var rýmdur í flýti um nótt vegna jarðskjálfta og yfirvofandi eldgoss. Gígja Hólmgeirsdóttir dagskrárgerðarmaður hefur tekið saman viðtöl sem hún tók við íbúa Grindavíkur 14.-21. nóvember. Við heyrðum í henni.
Tuttugasta og áttunda loftslagsþing sameinuðu þjóðanna, COP28 er að skríða af stað í Dubai og mun standa næstu tvær vikur. Formaður loftslagsráðs sagði á dögunum þingið vera síðasta tækifæri heimsins til að ná samstöðu um þessi mál. Þó krísan sé mikil berast fréttir af meintum áformum um olíuviðskipti á þinginu, hagsmunaaðillar í kjötiðnaði hafa boðað komu sína en Bandaríkjaforseti sér ekki ástæðu til að mæta. Við spyrjum hreinlega -er nema von að almenningur sé orðinn vonlítill og uppgefinn þegar þetta á að bjarga okkur? Björg Eva Erlendsdóttir framkvæmdastjóri Landverndar leit við hjá okkur.
Íslenska kvennalandsliðið í handbolta tapaði gegn Slóveníu í fyrsta leik sínum á HM, 30-24, þrátt fyrir ágætis frammistöðu. Við heyrðum í okkar fólki í Stafangri, fórum yfir leikinn og það sem framundan er um helgina.
Svolítið afmælisbragð var af fréttum vikunnar í dag. Gulli Helga og Linda Blöndal fóru með okkur yfir þær og litu í leiðinni aðeins með okkur í aftursýnisspegilinn á Rásinni góðu.
Fjörutíu ár eru liðin frá fyrsta greinda HIV smitinu á Íslandi. Síðan þá hefur mikið unnist en sagan er óneitanlega sár og enn setur veiran mark sitt á líf fjölda fólks út um allan heim. Í dag er alþjóðlegur dagur alnæmis og Einar Þór Jónsson formaður HIV á Íslandi kom til okkar.
Notendur Spotify deila nú margir hverjir samantektinni sem streymisveitan birtir fyrir þá í lok árs, en þannig sér fólk hvaða lög, flytjendur og hlaðvörp það hefur hlustað mest á. Við ræddum við Arnar Eggert Thoroddsen, aðjúnkt í félagsfræði við Háskóla Íslands og tónlistarsérfræðing, um árið 2023 í tónlist og hlaðvörpum, hvað var vinsælast hér heima og úti og breytingar sem eru að verða í hlustun, The Economist fjallaði til að mynda um það að enskan væri á undanhaldi í tónlistinni.
Lagalisti:
KUSK & ÓVITI - Elsku vinur.
Pálmi Gunnarsson - Þorparinn.
BJÖRK - Afi.
Løv og Ljón - Ég gef þér allt mitt líf.
BJÖRGVIN HALLDÓRSSON - Himinn Og Jörð.
Eiríkur Hauksson - Gaggó Vest (í minningunni).
FRIÐRIK DÓR - Hlið við hlið.
PATRi!K, Luigi - Skína.
