Umsjón: Hafdís Helga Helgadóttir og Ingvar Þór Björnsson
Á morgun heldur sex kvenna siglingahópurinn Seiglurnar af stað í keppnisferðalag til New york. Þetta er hvergi nærri þeirra fyrsta sigling, þær sigldu til að mynda hringinn í kringum landið fyrir tveimur árum síðan. En hvernig fer siglingakeppnin fram og hvernig er undirbúningurinn? Anna Karen Jörgensdóttir, seglatjúner eða seglastillir og Sigríður G. Ólafsdóttir, skipstjóri og stýrimaður kíkja til okkar og geta eflaust svarað því.
Anna Gunndís Guðmundsdóttir, leikkona, skrifaði vel lesna skoðanagrein á Vísi í gær um fimm stjörnu lúxushótel bananaflugunnar, og vísaði þar til karfa og bréfpoka undir matarafganga sem Sorpa útvegaði fólki á dögunum þegar nýtt flokkunarkerfi var innleitt á höfuðborgarsvæðinu og Suðurnesjum. Í greininni segir hún að henni hafi nú verið þröngvað í sambúð með bananaflugunni gegn sínum vilja, pokarnir mígleki og vökvinn lendi á botninum á körfunni. Þá furðar hún sig á að ekki sé lok á fjandans körfunni, eins og hún orðar það. Við ræðum þessi mál við Frey Eyjólfsson, verkefnastjóra hringrásarhagkerfisins, og spyrjum hvort mikil óánægja sé með nýtt flokkunarkerfi.
Ásta Sigrún Helgadóttir, umboðsmaður skuldara, verður gestur okkar fyrir átta fréttir. Verðbólgan og vaxtahækkanirnar hafa tilfinnanleg áhrif á flest og umsóknir um aðstoð umboðsmanns skuldara eiga það til að aukast þegar dýrtíð hefur verið í nokkurn tíma.
Við tökum stöðuna á mótmælendunum sem sitja sem fastast í möstrum hvalveiðibátanna í Reykjavíkurhöfn. Valgerður Árnadóttir, talskona Hvalavina, verður á línunni.
60% unglingsstúlkna hefur orðið fyrir stafrænu kynferðisofbeldi. Þetta kom fram á farsældarþingi barna sem haldið var í gær. Lög til að taka á stafrænu ofbeldi eru nú ríflega tveggja ára. Hafa þau engan árangur borið? Hvaða tól hefur lögreglan til að taka á þessum málum? María Rún Bjarnadóttir, lögfræðingur og verkefnisstjóri gegn stafrænu ofbeldi hjá Ríkislögreglustjóra kemur til okkar.
Sævar Helgi Bragason, vísindasérfræðingur Morgunútvarpsins, kemur til okkar í lok þáttar, eins og alltaf annan hvern þriðjudag. Í dag ræðum við útrýmingu mannsins annars vegar og ketti og túnfisk hins vegar.
Lagalisti:
EGÓ - Fallegi lúserinn minn.
CHRISTINE AND THE QUEENS - A day in the Water.
SIMPLE MINDS - Alive And Kicking.
DUA LIPA - Dance The Night.
MOLOKO - Sing it back.
SPRENGJUHÖLLIN - Verum í sambandi.
JÓNFRÍ - Andalúsía.
NEW ORDER - True Faith.
