Í vikunni hafa fjármálaráðherra og viðskiptaráðherra enn einu sinni tekist á um gildi hvalrekaskatts fyrir íslenska bankakerfið, fyrir opnum tjöldum. Við ætlum að ræða svigrúm bankakerfisins til aukinnar skattgreiðslna nú þegar bankarnir skila methagnaði hvern ársfjórðunginn á fætur öðrum. Yngvi Örn Kristinsson hagfræðingur Samtaka fjármálafyrirtækja kom til okkar.
Það er staðreynd að ríkustu þjóðir heims eru jafnframt mestu mengunarvaldarnir en jafnframt að loftslagsbreytingar leggjast hins vegar hvað þyngst á fátækustu svæði jarðar. Fátækustu ríkin hafa því ekki mikið olnbogarúm þegar kemur að því að gera róttækar breytingar til að standast loftslagsskuldbindingar en íslenska sprotafyrirtækið SoGreen hefur séð við þessu og þróað reiknilíkan með það að markmiði að umbreyta menntun stúlkna í kolefniseiningar. Hljómar flókið en í grunninn snýst málið um það að menntaðar konur lifi á umhverfisvænni hátt, eignis færri börn og lesi umhverfi sitt betur. Guðný Nielsen stofnandi SoGreen sagði okkur betur frá þessu.
Íslenska tónlistarkonan Laufey er orðin vinsælasti djasstónlistarmaður Spotify og hefur, að sinni að minnsta kosti, slegið út ekki ómerkari nöfn en Miles Davis og Billie Holiday. Hvernig má þetta vera? Björgvin Ingi Ólafsson er sannkallaður tónlistargagna-rýnir og kom til okkar að tala um ótrúlegt ris Laufeyjar.
Fréttir vikunnar voru á sínum stað og eitt og annað til umræðu. Þóra Kristín Ásgeirsdóttir upplýsingafulltrúi Íslenskrar erfðagreiningar og Pétur Markan biskupsritari voru gestir okkar að þessu sinni.
Og í lok þáttar kom drottningin sjálf, Páll Óskar Hjálmtýsson, til okkar. Við höfum gefið hinsegindögum gaum í öllum þáttum vikunnar og því mjög viðeigandi að fá Palla til okkar til að hita upp fyrir Pride gönguna sem leggur af stað frá Hallgrímskirkju klukkan 14:00 á morgun, laugardag.
Tónlist
GDRN - Parísarhjól.
DAÐI FREYR - Whole Again.
LAUFEY - From The Start.
LAUFEY - Falling Behind.
Moses Hightower - Sjáum hvað setur.
PÁLL ÓSKAR - Ég er eins og ég er.
PÁLL ÓSKAR - Allt fyrir ástina.
