Starfsemin

Mynd með færslu

Ríkisútvarpið er útvarp allra landsmanna. Meginmarkmið þess er að upplýsa, fræða og skemmta. Þetta þríþætta hlutverk kemur fram í áherslum í fréttum, menningarefni og afþreyingu í útvarpi, sjónvarpi og öðrum miðlum. RÚV miðlar texta, hljóði og myndum og sinnir öryggisþjónustu á sviði útvarps. 95% þjóðarinnar nýta sér þjónustu RÚV í hverri viku og yfir 76% nýta sér þjónustu Ríkisútvarpsins daglega sem er með því mesta sem þekkist meðal ríkisfjölmiðla í Evrópu. 

Við flytjum fréttir í útvarpi, sjónvarpi og á vefnum allan sólahringinn alla daga ársins. Metnaðarfull og fjölbreytt dagskrá er á öllum miðlum RÚV. Útvarpsrásirnar eru Rás 1, Rás 2 og Rondó. Ríkisútvarpið sendir út fjölbreytta sjónvarpsdagskrá á RÚV en hefur einnig til umráða aukarás sem ber heitið RÚV 2. Á vefnum RÚV.IS er fréttavakt allan sólarhringinn og nær allt dagskrárefni sjónvarps og útvarps er aðgengilegt á vefnum í svokölluðum vefspilara RÚV. Einnig er auðvelt að nálgast efni RÚV á farsímum, spjaldtölvum og víðar í RÚV-appi. 

Dagskrársvið útvarps skiptast í Menningu og Rás 1 og Númiðlun og Rás 2 sinnir framleiðslu og kaupum á efni fyrir útvarpsrásirnar en dagskrá þeirra er ólík og sinnir ólíkum þörfum. Á báðum rásum er lögð rík áhersla á menningarumfjöllun. Dagskrársvið sjónvarps sinnir framleiðslu og kaupum á efni fyrir sjónvarpsrásirnar og stýrir íþróttaumfjöllun á öllum miðlum RÚV. Einnig heyrir KrakkaRÚV og UngRÚV  undir dagskrársvið sjónvarps en KrakkaRÚV beinir efni að börnum upp að 12 ára aldri, en svo tekur UngRÚV við fyrir notendur til 16 ára aldurs. Fréttasvið stýrir fréttumfjöllun í öllum miðlum Ríkisútvarpsins með áherslu á samvinnu við önnur svið um miðlun fréttaumfjöllunar. RUV English er nýjasta vefviðbótin innan fréttasviðs, en með auknu fréttaframboði á ensku er ætlunin að mæta auknum fjölda íbúa landsins sem ekki hafa íslensku sem móðurmál, auk þess að vera þjónusta við ferðamenn. 

Hlutverk númiðlasviðs er að reka og þróa vef Ríkisútvarpsins, www.rúv.is og þróun snjalltækjalausna svo sem RÚV-appsins. Sviðið ritstýrir efni á vefnum, stuðlar að því að hann sé áhugaverður, vandaður og fjölsóttur miðill þar sem efnisframboð RÚV er aðgengilegt. Einnig sinnir sviðið miðlun efnis RÚV á samfélagsmiðla, í VOD og fyrir aðra nýmiðla í samstarfi við dagskrárstjóra. Hlutverk deildarinnar er einnig að fara fyrir innleiðingu og notkun RÚV á nýjum miðlum og samskiptaformum. RÚVnúll heyrir undir vef- og nýmiðladeild og beinir sjónum að notendum 16-25 ára. Efni sem framleitt er fyrir RÚVnúll birtist nær eingöngu á vef. 

Samskipta-, notenda- og þróunarsvið setur eigendur RÚV, áhorfendur og hlustendur, í öndvegi. Markmið sviðsins er að opna umræðuna um hlutverk og dagskrá RÚV og kappkosta að hún skili sér í áherslum og stefnu fyrirtækisins. Sviðið stuðlar að auknu og opnara samtali um Ríkisútvarpið, inn á við og út á við. Það hefur með höndum kynningar- og markaðsmál og greiningu á notkun á miðlum RÚV. Samskiptasvið vinnur úr ábendingum frá almenningi. Stefnumótun, þróun og mannauðsmál heyra undir sviðið. Undir Svið rekstrar, fjármála og tækni heyra allar rekstrar-, fjármála- og tæknideildir fyrirtækisins, sem og auglýsingadeild. Svið framleiðslu og ferla er nýtt svið í kjölfar stefnumótunar 2017. Sviðið fer með rekstur sjónvarps- og kvikmynda- og hljóðvera RÚV, hvort sem er fyrir RÚV eða aðra. Undir sviðið heyrir förðun, búningadeild og leikmynd, auk safnadeildar. Skrifstofustjóri á skrifstofu útvarpsstjóra sér um samskipti við ýmsa opinbera hagsmunaaðila, nefndir og samtök, innanlands og erlendis og sinnir lögfræðilegum málefnum fyrir hönd RÚV.

Við leggjum sérstaka rækt við íslenska tungu, sögu þjóðar, menningararfleifð og tengsl við almenning. RÚV leggur áherslu á að sinna börnum og ungmennum af metnaði og skrásetur samtímasögu þjóðarinnar í hljóði og mynd með varðveislu alls dagskrárefns. Hljóðritanir, filmur, myndefni og aðrar sögulegar minjar eru aðgengilegar almenningi á Safnadeild RÚV.

Starfsstöðvar RÚV eru í Efstaleiti 1 í Reykjavík, við Hólabraut 13 á Akureyri, við Borgarbraut 54 í Borgarnesi, Miðvangi 2-4 á Egilsstöðum og Aðalstræti 20 á Ísafirði. 

 

Miðlarnir

Mynd með færslu

RÚV – sjónvarpið okkar

RÚV er sjónvarpsstöð í eigu íslensku þjóðarinnar. Hlutverk stöðvarinnar er að upplýsa, fræða og skemmta áhorfendum á öllum aldri. Innlend dagskrá er í öndvegi, nýir þættir, leikið efni, fræðsla, fréttir, umræða, leikuppfærslur, íþróttir, kvikmyndir, heimildamyndir og stuttmyndir. Að auki er í boði sérvalið erlent efni og yngstu áhorfendurnir fá alls uppbyggjandi og skemmtilegt efni við sitt hæfi, íslenskt eða talsett á íslensku.  RÚV er  mikilvægur þátttakandi í íslensku menningarlífi, vettvangur fyrir metnaðarfulla og fjölbreytta nýsköpun í dagskrárgerð, leiðandi í efnistökum og gæðum, veita afþreyingu og vera gluggi að erlendri menningu og málefnum.

RÚV2 - þegar mikið liggur við

RÚV2 er aukarás Ríkisútvarpsins og viðburðasjónvarpsstöð. Ekki er boðið upp á samfellda dagskrá heldur er stöðin nýtt sem viðbót við aðalrás Ríkisútvarpsins, RÚV. Þar er einkum boðið upp á beinar útsendingar og upptökur frá markverðum menningar- og íþróttaviðburðum, innlendum sem erlendum.

Rás 1 - við viljum vekja forvitni ykkar

Rás 1 endurómar lífið í landinu, heimsbókmenntirnar, listirnar, vísindi og fræði í sögu, samtíð og framtíð. Rás 1 er ekkert óviðkomandi. Á Rás 1 geta hlustendur leyft sér að gleyma erli hversdagsins. Hlustendum er boðið í ævintýraferð, þeir heyra sögur af áhugaverðu fólki, fréttir og umræður um menn og málefni af ýmsu tagi, hlýða á tónleika Sinfóníuhljómsveitar Íslands eða fara í leikhús.

Rás 2 - við látum ykkur vita hvað er að gerast

Íslensk tónlist er hjartað í Rás 2. Meginhlutverk hennar er að fylgjast með og sinna íslenskri tónlist, spila hana, kynna hana og fjalla um hana. En það er ekki bara hjartað sem heldur okkur á lífi. Yfirlýst markmið RÚV er að upplýsa, fræða og skemmta. RÁS 2 hefur frá upphafi verið mjög öflugt dægurmálaútvarp, útvarp með puttann á púlsinum í dægurmálum, menningu og þjóðmálaumræðu.

Rondó - sígild tónlist allan sólarhringinn

Rondó er alsjálfvirk útvarpsstöð fyrir þá sem vilja láta koma sér á óvart með sígildri tónlist heimsins.

RÚV.is - þegar þú vilt, þar sem þú vilt

RÚV.IS er ekkert mannlegt óviðkomandi. Vefur RÚV er suðupottur, þar stöndum við fréttavaktina allan sólarhringinn og miðlum miklu magni úrvalsefnis allan sólarhringinn, alla daga ársins. Fréttir, menning, mannlif og skemmtiefni, allt sem máli skiptir og nýjustu fréttir þegar þú vilt.  Á vef leitumst við við að mæta ólíkum þörfum notenda, hvort sem er með línulegri dagskrá eða þegar notendum hentar. Vefspilarinn á RÚV.IS og RÚV-appið eru einföld leið til að hlusta og horfa á það sem þú vilt, þar sem þú vilt, þegar þú vilt. Í RÚV-appi bætast meira en 400 upptökur úr útvarpi og sjónvarpi vikulega.

 

Fréttaþjónusta

Mynd með færslu

Fréttastofa RÚV flytur fréttir í útvarpi, sjónvarpi og á vefnum allan sólarhringinn alla daga ársins og færir landsmönnum nýjustu  tíðindi og fréttaskýringar af innlendum sem erlendum vettvangi.

Fréttaþjónusta RÚV er sjálfstæð, áreiðanleg, almenn og hlutlæg. Hún er vettvangur fyrir mismunandi skoðanir á málum sem efst eru á baugi hverju sinni og almenning varða. Vandaðir sjónvarpsfréttatímar og veðurfréttatímar eru daglega en fjóra daga vikunnar eru þeir tveir dag á dag.  Þá eru daglega táknmálsfréttir í sjónvarpi.  Útvarpsfréttatímar í beinni útsendingu eru 16-17 talsins hvern dag auk veðurfrétta sem fluttar eru fimm sinnum á dag.  Fréttamenn eru á vakt allan sólarhringinn og uppfæra vefinn RÚV.IS með því allra nýjasta hverju sinni.  Þá er boðið upp á fréttaskýringarþætti þar sem kafað dýpra í mál líðandi stundar.  Önnur föst verkefni fréttastofunnar eru fréttaannálar í útvarpi og sjónvarpi. Beinar útsendingar frá stefnuræðu forsætisráðherra, eldhúsdagsumræðum á Alþingi sem og frá setningu Alþingis auk umfjöllunar um kosningar til sveitarstjórnar, Alþingis og forseta Íslands.  Fréttastofa RÚV er hluti af almannavörnum og sinnir mikilvægri öryggisþjónustu vegna jarðhræringa, veðurs, ófærðar og annarra stóratburða. Fer fyrirvaralaust í útvarps- og sjónvarpsútsendingar er almannahagsmunir liggja við. 

 

Aðgengismál

Mynd með færslu

Ríkisútvarpið tekur það hlutverk sitt alvarlega að veita heyrnar- og sjónskertum víðtæka þjónustu jafnt við miðlun menningar og upplýsinga er varða allan almenning og stuðla að því að heyrnar- og sjónskertir fái upplýsingar og geti verið virkir þátttakendur í samfélaginu. Okkar metnaðarmál er að sinna öllum landsmönnum eins vel og kostur er og leitum sífellt nýrra og betri leiða til að tryggja það.

Allt fyrirfram unnið dagskrárefni Ríkisútvarpsins, íslenskt sem erlent, er sent út með texta. Texti með innlendu efni er birtur á síðu 888 í textavarpinu. Kvöldfréttir kl. 19 og íþróttir að þeim loknum eru sendar út með skjátexta. Innlendir þættir sem ekki næst að texta fyrir frumsýningu eða sýndir eru í beinni útsendingu eru textaðir fyrir endursýningu. Allt erlent efni, jafnt fréttir sem fróðleikur og afþreying, er þýtt og sent út með íslenskum texta, nema í fáeinum tilvikum þegar erlent efni er sýnt í beinni útsendingu. Markmiðið er að auka þessa þjónustu enn frekar.  

Sem fyrr flytur RÚV daglega fréttir á táknmáli og þær eru jafnframt aðgengilegar í Vefspilaranum á rúv.is. RÚV er eina íslenska fréttaveitan sem býður upp á sjónvarpsfréttir ætlaðar heyrnarlausum. Þegar flytja þarf fréttir af náttúruhamförum sem snerta alla landsmenn er kallaður til rittúlkur sem og þegar túlka þarf lengri viðtöl og annað efni í beinni útsendingu. Í aðdraganda kosninga er rittúlkur nýttur eftir föngum.

Með endurbættum vef er lögð áhersla á að greina frá efni þátta í öllum miðlum RÚV svo aðgengi heyrnarskertra að útvarpsþáttum eykst. Þar er líka gott aðgengi að fréttum og fréttavakt allan sólarhringinn. Vefurinn er aðgengilegur skjálesurum sem blindir og sjónskertir nota. Íslensk vefþula er einnig í boði á vefnum en hún les upphátt allan texta. RÚV.is er jafnframt hannaður í samvinnu við aðgengissérfræðinga.

Ríkisútvarpið kappkostar að sinna aðgengismálum eftir bestu getu og því tökum við öllum ábendingum fagnandi hvað þetta varðar. 

RÚV utan Reykjavíkur

RÚV Akureyri

RÚV rekur öfluga starfsemi út um land allt. Höfuðstöðvarnar á landsbyggðinni er á Akureyri þar sem fréttum og dagskrárgerð í sjónvarpi, útvarpi og vef er sinnt. RÚV hefur einnig fréttamenn á Vestfjörðum, Vesturlandi, Austurlandi og Suðurlandi.

Öflug fréttaþjónusta af landsbyggðinni er ein sérstaða RÚV og er lögð mikil áhersla á trausta og góða þjónustu við áhorfendur og hlustendur. Öryggis- og almannavarnarhlutverk RÚV spilar þar stóran þátt. Oftast er sjónum beint að viðkomandi landssvæði, með beinum útsendingum, fréttum, fréttaskýringum eða þáttum, en einnig málum sem varða landið allt.

Jafnlaunastefna

RÚV hefur innleitt jafnlaunakerfi sem nær til alls starfsfólks. Kerfið inniheldur jafnréttisáætlun og byggist jafnlaunastefna RÚV á henni. Markmið jafnlaunakerfis RÚV er að tryggja launajafnrétti kynjanna. Konum og körlum skulu greidd sömu laun fyrir jafnverðmæt og sambærileg störf og þar með tryggja jafna stöðu kynjanna innan RÚV. Jafnlaunastefnan felur í sér skuldbindingu um stöðugar umbætur, eftirlit og viðbrögð.  
Útvarpsstjóri ber ábyrgð á jafnlaunakerfinu og að það sé í samræmi við lög nr. 10/2008 um jafna stöðu og jafnan rétt kvenna og karla.  Mannauðsstjóri er fulltrúi æðstu stjórnenda og ber ábyrgð á innleiðingu og viðhaldi í samræmi við jafnlaunastaðalinn. Mannauðsstjóri ber ábyrgð á að skila skýrslum til æðstu stjórnenda um jafnlaunakerfi, gæði þess og skilvirkni, sem og tilmælum um úrbætur. 
Framkvæmdastjórn skal setja fram jafnlaunamarkmið og rýna jafnlaunakerfið árlega. Jafnlaunamarkmiðin ná til allra starfsheilda RÚV. Jafnlaunamarkmið skulu endurskoðuð út frá niðurstöðum launagreiningar. 
Til þess að framfylgja stefnunni mun RÚV framkvæma launagreiningu árlega þar sem borin eru saman jafnverðmæt og sambærileg störf og kannað hvort munur mælist eftir kyni. Mannauðsstjóri skal vera meðvitaður um að stöðugar umbætur þurfa að eiga sér stað. Stjórnendur skulu jafnframt skuldbinda sig til þess að viðhalda stöðugum umbótum, eftirliti og bregðast við óútskýrðum launamun og þeim frávikum sem koma fram við rýni á jafnlaunakerfinu. 
Ef upp kann að koma óútsýrður munur á launum fyrir sambærileg störf skal sá munur skoðaður, leitað skýringa og unnið að úrbótum. 

9. október 2018 

Persónuverndaryfirlýsing RÚV

Ríkisútvarpið ohf., Efstaleiti 1, 103 Reykjavík („RÚV“) hefur einsett sér að tryggja í hvívetna áreiðanleika, trúnað og öryggi allra persónuupplýsinga sem unnið er með á vegum þess.

Hjá RÚV er unnið með persónuupplýsingar í tengslum við fréttaþjónustu og dagskrárgerð, unnið er með persónuupplýsingar starfsmanna og umsækjanda um störf auk þess sem unnið er með tengiliðaupplýsingar samstarfsaðila, birgja og viðskiptavina RÚV.

Í yfirlýsingu þessari er því lýst hvernig RÚV vinnur með persónuupplýsingar. Um vinnslu á persónuupplýsingum starfsmanna er þó fjallað í sérstakri persónuverndaryfirlýsingu.

Öll vinnsla RÚV á persónuupplýsingum fer fram á grundvelli laga nr. 90/2018 um persónuvernd og vinnslu persónuupplýsinga („persónuverndarlög“), en lögin eiga þó aðeins að takmörkuðu leyti við um þá vinnslu sem fer fram í þágu fréttamennsku og bókmenntalegrar eða listrænnar starfsemi RÚV.

Ef þú hefur spurningar varðandi yfirlýsingu þessa eða vinnslu RÚV á persónuupplýsingum er þér bent á að hafa samband við persónuverndarfulltrúa RÚV, sbr. 6. gr. í yfirlýsingu þessari.

1. Persónuupplýsingar og grundvöllur vinnslu

Fréttaflutningur og dagskrárgerð

RÚV er útvarp allra landsmanna og er meginmarkmið þess að upplýsa, fræða og skemmta. Þetta þríþætta hlutverk kemur fram í áherslum í fréttum, menningarefni og afþreyingu í útvarpi, sjónvarpi og öðrum miðlum RÚV.

Unnið er með umtalsvert magn persónuupplýsinga í tengslum við fréttaflutning og dagskrárgerð, þ.á m. persónuupplýsingar viðmælenda, heimildarmanna og þeirra einstaklinga sem eru viðfangsefni fréttaflutnings hverju sinni.

RÚV leggur áherslu á að unnið sé slíkar upplýsingar í samræmi við meginreglur persónuverndarlaga. Þannig er gætt að áreiðanleika upplýsinganna, sanngirnis er gætt við vinnslu og ekki er unnið með meiri upplýsingar en þörf er á.

Samstarfsaðilar, viðskiptavinir og birgjar

RÚV vinnur með tengiliðaupplýsingar samstarfsaðila, viðskiptavina (s.s. auglýsenda) og birgja sem og tengiliðaupplýsingar forsvarsmanna slíkra aðila. Þá er jafnframt haldið utan um samskiptasögu. Vinnsla þessi er nauðsynleg á grundvelli samnings RÚV við umrædda aðila.

Samstarfsaðilar, viðskiptavinir og birgjar

RÚV vinnur með tengiliðaupplýsingar samstarfsaðila, viðskiptavina (s.s. auglýsenda) og birgja sem og tengiliðaupplýsingar forsvarsmanna slíkra aðila. Þá er jafnframt haldið utan um samskiptasögu. Vinnsla þessi er nauðsynleg á grundvelli samnings RÚV við umrædda aðila.

Gestir í húsnæði RÚV

Öllum gestum sem heimsækja húsnæði RÚV ber að skrá sig inn með því að gefa upp nafn sitt, símanúmer (valkvætt) og vinnustað (valkvætt). Með þessar upplýsingar er unnið á grundvelli lögmætra hagsmuna RÚV en mikilvægt er fyrir RÚV að geta tryggt yfirsýn yfir þá sem eru í húsinu hverju sinni í öryggis- og eignavörsluskyni.

Rafræn vöktun í húsnæði RÚV

Í húsnæði RÚV fer fram rafrænt myndavélaeftirlit, þ.á m. við innganga í húsnæðið. Þau svæði sem eru vöktuð eru sérstaklega merkt með þar til gerðum merkingum. Umrædd vöktun fer fram á grundvelli lögmætra hagsmuna RÚV í eigna- og öryggisvörsluskyni.

Notkun á vefsíðu og smáforritum RÚV

Svokölluð fótspor (e. cookies) eru notuð til að telja heimsóknir á vefinn. Það er stefna RÚV að nota fótspor sparlega og með ábyrgum hætti. Notendur geta stillt vafra sína þannig að þeir láti vita af fótsporum eða hafni þeim með öllu.

RÚV notar Google Analytics til vefmælinga. Við hverja komu eru nokkur atriði skráð, svo sem tími og dagsetning, leitarorð, frá hvaða vef er komið og gerð vafra og stýrikerfis. Þessar upplýsingar notar RÚV við endurbætur á vefnum og þróun hans.

RÚV notar Firebase Analytics til að safna tölulegum upplýsingum um spilun á efni í smáforritum RÚV, að undanskildu KrakkaRÚV smáforritinu sem ætlað er börnum. Allar upplýsingar eru þó ópersónugreinanlegar og tímabundnar.

RÚV notar Sentry til að safna upplýsingum um villur við spilun á efni, að undanskildu KrakkaRÚV smáforritinu sem ætlað er börnum. Allar upplýsingar eru þó ópersónugreinanlegar og tímabundnar.

Hér fyrir neðan má nálgast yfirlit yfir þau fótspor sem notuð eru í smáforritum RÚV og þau fótspor sem vefsvæði RÚV notast við auk þess sem leiðbeint er um það hvernig hægt er að slökkva á umræddum fótsporum.

Ábendingar og skilaboð í gegnum vefsíðu RÚV

Á vefsíðu RÚV er hægt að koma að ábendingum og skilaboðum til starfsmanna og einstakra deilda. RÚV óskar eftir nafni og netfangi þeirra sem vilja koma að slíkum ábendingum og skilaboðum þannig að hægt sé svara erindinu. Vinnslan fer því fram á grundvelli lögmætra hagsmuna RÚV. Í tengslum við formleg erindi til RÚV eða siðanefndar er jafnframt óskað eftir kennitölu, auk nafns og netfangs, en unnið er með slík erindi í samræmi við reglur siðanefndar sem nálgast má hér.

Umsóknir, pantanir á efni úr safni RÚV og innsend tónlist

Þegar RÚV auglýsir eftir umsóknum, s.s. innsendum lögum í Söngvakeppnina, er það oftar en ekki gert í gegnum Mitt RÚV. Til þess að stofna aðgang á Mínu RÚV er óskað eftir nafni, símanúmeri, netfangi og heimilisfangi. Þá þurfa notendur að auðkenna sig og í tengslum við slíka auðkenningu er unnið með nafn viðkomandi og kennitölu.

Í tengslum við aðrar umsóknir, s.s. í Tónskáldasjóð, er unnið með nafn, kennitölu, heimilisfang og netfang auk ferilskrár og annað það efni sem umsækjendur kjósa að afhenda með umsókn sinni.

Í gegnum RÚV vefinn er jafnframt hægt að panta efni úr safni RÚV. Í tengslum við slíkar beiðnir er unnið með efni beiðninnar auk nafns, kennitölu, netfangs og símanúmers þess sem óskar eftir efninu,í þeim tilgangi að afgreiða beiðni og svara erindinu.

Umsækjendur um störf hjá RÚV

RÚV vinnur með ýmsar persónuupplýsingar um umsækjendur. Ólíkum persónuupplýsingum kann að vera safnað fyrir mismunandi störf og kann vinnsla og söfnun því að fara eftir eðli starfs.

Í tengslum við öll störf vinnur RÚV með tengiliðaupplýsingar umsækjenda, s.s. nafn, kennitölu, netfang og símanúmer. Þá vinnur RÚV með upplýsingar um menntun og starfsreynslu, tungumála- og tölvukunnáttu auk annarra upplýsinga sem umsækjendur velja að afhenda með umsókn sinni. 

Í tengslum við ákveðin störf, þ.á m. stöðu fréttamanna, mun RÚV jafnframt vinna með úrlausn fréttamannaprófa og eftir atvikum prófa um íslenskt mál og málefni líðandi stundar hvað varðar þá umsækjendur sem komast áfram í valferli. Komist umsækjandi áfram í viðtal vinnur RÚV jafnframt með þær upplýsingar sem fram koma um umsækjanda í því viðtali og eftir atvikum frá meðmælendum.

Þá kann RÚV jafnframt að gera þá kröfu að umsækjendur sem fá boð um starf hjá RÚV skili inn afriti af sakavottorði. Slík vinnsla byggir á lögmætum hagsmunum RÚV, til að tryggja öryggi á vinnustað, og eftir atvikum samþykki umsækjenda. 

Að meginstefnu aflar RÚV persónuupplýsinga beint frá umsækjendum, ef frá eru taldar upplýsingar frá meðmælendum. 

Vinnsla persónuupplýsinga umsækjenda er nauðsynleg svo RÚV geti lagt mat á umsókn og valið hæfasta umsækjandann til að gegna viðkomandi starfi. Vinnslan er því nauðsynleg í því skyni að gera ráðstafanir að beiðni umsækjenda áður en samningur er gerður. 

Sérstök athygli er vakin á því að RÚV ber lagaskylda til að varðveita umsóknir umsækjenda og afhenda Þjóðskjalasafni, sbr. 4. gr. í þessari yfirlýsingu.

Þá er sérstök athygli jafnframt vakin á því að RÚV kann að áskilja sér rétt í tengslum við ráðningar í ákveðnar stjórnunarstöður að birta lista yfir umsækjendur.

2. Miðlun til þriðju aðila

RÚV kann að veita þriðju aðilum sem veita RÚV upplýsingatækniþjónustu og/eða aðra þjónustu sem tengist vinnslu og er hluti af rekstri RÚV aðgang að persónuupplýsingum þeim sem unnið er með, s.s. hýsingaraðila. 

Þessir aðilar kunna að vera staðsettir utan Íslands. RÚV mun þó ekki miðla persónuupplýsingum utan Evrópska efnahagssvæðisins nema slíkt sé heimilt á grundvelli viðeigandi persónuverndarlöggjafar, s.s. á grundvelli staðlaðra samningsskilmála, samþykki viðkomandi einstaklings eða auglýsingar Persónuverndar um ríki sem veita persónuupplýsingum fullnægjandi vernd.

Komi til innheimtuaðgerða vegna kröfu RÚV kann jafnframt að þurfa að miðla persónuupplýsingum til innheimtuaðila. 

Persónuupplýsingar kunna jafnframt að vera afhentar þriðja aðila að því marki sem heimilað er eða krafist er á grundvelli viðeigandi laga eða reglna eða til að bregðast við löglegum aðgerðum eins og húsleitum, stefnum eða dómsúrskurði.

Á grundvelli lagaskyldu er RÚV þannig t.a.m. skylt að skila upplýsingum til Þjóðskjalasafns, sbr. 4. gr. í yfirlýsingu þessari.

Ef ákvörðun er tekin um að birta lista yfir umsækjendur þá þyrfti að byggja það á lögmætum hagsmunum RÚV og láta viðkomandi umsækjendur vita áður en slík birting fer fram (í auglýsingu um starf). Ekki er hægt að byggja þá vinnslu á samþykki ef viðkomandi umsækjendur þurfa annað hvort að veita samþykki eða draga umsókn sína til baka. Þá væri í raun um þvingað samþykki að ræða skv. lögunum sem ekki er gilt.

3. Hvernig er öryggi upplýsinganna tryggt?

RÚV leitast við að grípa til viðeigandi tæknilegra og skipulegra ráðstafana til að vernda persónuupplýsingar með sérstöku tilliti til eðlis þeirra. Þessum ráðstöfunum er ætlað að vernda persónuupplýsingar gegn því að þær glatist eða breytist fyrir slysni og gegn óleyfilegum aðgangi, afritun, notkun eða miðlun þeirra. Dæmi um öryggisráðstafanir sem RÚV grípur til eru aðgangsstýringar í kerfum félagsins.

Þá stuðlar RÚV að virkri öryggisvitund starfsmanna með viðeigandi fræðslu og þjálfun varðandi öryggi við vinnslu persónuupplýsinga.

4. Varðveisla á persónuupplýsingum

Þar sem RÚV er afhendingarskyldur aðili á grundvelli laga nr. 77/2014 um opinber skjalasöfn er RÚV óheimilt að ónýta eða farga nokkru skjali sem fellur undir gildissvið laganna, nema með heimild þjóðskjalavarðar.

Almennt eru þær persónuupplýsingar sem RÚV vinnur því afhentar Þjóðskjalasafni að þrjátíu árum liðnum.

5. Réttindi þín hvað varðar þær persónuupplýsingar sem RÚV vinnur

Á grundvelli persónuverndarlaga kunna þeir einstaklingar sem RÚV vinnur persónuupplýsingar um að eiga ákveðin réttindi til aðgangs og eftir atvikum til afrits að þeim persónuupplýsingum sem RÚV vinnur. Við ákveðnar aðstæður eiga viðkomandi aðilar jafnframt rétt til að óska eftir því að persónuupplýsingum þeirra verði eytt, upplýsingarnar leiðréttar eða vinnsla þeirra takmörkuð. Þá kann jafnframt að vera til staðar réttur til að fá afrit af upplýsingum sem viðkomandi hefur sent RÚV á tölvutæku formi og eftir atvikum að RÚV sendi þær upplýsingar á þriðja aðila.

Þessi réttindi eru þó ekki fortakslaus. Réttindin eiga þannig ekki við um þá vinnslu er tengist fréttamennsku og bókmenntalegrar eða listrænnar starfsemi RÚV. Þá hvílir sú lagaskylda á RÚV að varðveita persónuupplýsingar á grundvelli laga um opinber skjalasöfn. Sú skylda gerir það að verkum að í mörgum tilvikum er RÚV ómögulegt að verða við eyðingarbeiðni. Þá kunna önnur lög eða réttindi þriðja aðila að takmarka rétt þeirra einstaklinga sem óska eftir að nýta umrædd réttindi.

Í þeim tilvikum er vinnsla RÚV byggir á samþykki getur sá sem samþykkið veitti alltaf afturkallað það.

Ef þú vilt nýta þér ofangreind réttindi er þér bent á að hafa samband við persónuverndarfulltrúa RÚV, sbr. 6. gr. í yfirlýsingu þessari.

6. Persónuverndarfulltrúi RÚV

Persónuverndarfulltrúi RÚV er Áslaug Björgvinsdóttir, lögmaður. Hægt er að hafa samband við hana með því að senda tölvupóst á netfangið personuvernd[hja]ruv.is eða hafa samband í síma 5400300.

Persónuverndarfulltrúi tekur á móti fyrirspurnum og beiðnum frá þeim einstaklingum sem verið er að vinna með upplýsingar um, auk þess að ráðleggja RÚV um vinnslu persónuupplýsinga og gegna því hlutverki að vera tengiliður við Persónuvernd.

7. Réttur til að kvarta til Persónuverndar

Ef að þú ert ósátt/ur við vinnslu RÚV á persónuupplýsingum getur þú sent erindi til Persónuverndar (www.personuvernd.is).

8. Endurskoðun

RÚV getur frá einum tíma til annars breytt persónuverndaryfirlýsingu þessari í samræmi við breytingar á viðeigandi lögum eða reglugerðum eða vegna breytinga á því hvernig unnið er með persónuupplýsingar.

Allar breytingar sem kunna að verða gerðar á yfirlýsingunni taka gildi eftir að uppfærð útgáfa hefur verið birt á vefsíðu RÚV.

Vafrakökur á vefsvæði RÚV

Heiti Lén Gildistími Tilgangur Ítarefni

__cfduid

.ruv.is

1 ár frá heimsókn

Notað af efnisveitunni CloudFlare til að greina trausta netumferð. Tengist engu persónugreinanlegu auðkenni.

Nánari upplýsingar í hjálpargrunni CloudFlare

Heiti Lén Gildistími Tilgangur Ítarefni
UID .scorecardresearch.com 2 ár frá heimsókn Þessar vafrakökur safna gögnum um notkun þína á vefsvæðinu. Gögnin eru send til comScore til greiningar í því skyni að bæta þá þjónustu sem við bjóðum upp á. Nánari upplýsingar um notkun comScore á þessum gögnum er að finna í persónuverndarstefnu ScorecardResearch. Hér getur þú afþakkað þátttöku í vefgreiningu ScorecardResearch
UIDR .scorecardresearch.com 2 ár frá heimsókn
Heiti Lén Gildistími Tilgangur Ítarefni
_ga .ruv.is 2 ár frá heimsókn Þessar vafrakökur geyma einkvæmt auðkenni sem er notað til að safna tölulegum upplýsingum um notkun á vefsvæðinu. Nánari upplýsingar um Google Analytics og notkun Google á vafrakökum má finna á upplýsingasíðu Google um persónuvernd skilmála. Hægt er að afþakka þátttöku í Google Analytics með því að setja upp vafraviðbót frá Google
_gid .ruv.is 1 dagur frá heimsókn
Heiti Lén Gildistími Tilgangur Ítarefni
IDE .doubleclick.net 2 ár frá heimsókn Notað til að tengja heimsókn á vefsvæðið við lýðfræðilegar upplýsingar ef þær eru fyrir hendi. Engar persónugreinanlegar upplýsingar eru tengdar heimsókninni. Nánari upplýsingar um vafrakökur frá DoubleClick má finna í hjálpargrunni þjónustunnar hér
Heiti Lén Gildistími Tilgangur Ítarefni
_parsely_visitor .ruv.is 2 ár frá heimsókn Nafnlaust og ópersónugreinanlegt auðkenni gests á vefsvæðinu. Nánari upplýsingar fást í persónuverndarstefnu Parse.ly þar sem einnig má finna tengil til að afþakka þátttöku í vefgreiningarþjónustu þeirra hér
_parsely_session .ruv.is 30 mínútur frá heimsókn Tengir stakar aðgerðir á vefsvæðinu við nafnlaust auðkenni gests yfir vafralotuna.
_parsely_network_uuid .config.parsely.com Ótakmarkaðar Notað fyrir samansafn nafnlausra tölfræðiupplýsinga fyrir samanburð við önnur vefsvæði.
Heiti Stýrikerfi Gildistími Tilgangur Ítarefni
Firebase Analytics Android og iOS 2 ár frá söfnun Innsend gögn geyma auðkenni sem er notað til að safna tölulegum upplýsingum um spilun á efni. Nánari upplýsingar um Firebase Analytics og notkun Google á upplýsingum sem koma frá forritum sem nýta þeirra þjónustur má finna á upplýsingasíðu Google um persónuvernd.
Sentry
Heiti Stýrikerfi Gildistími Tilgangur Ítarefni
Sentry Android og iOS 2 ár frá söfnun RÚV notar Sentry til að safna upplýsingum um villur við spilun á efni, að undanskildu KrakkaRÚV smáforritinu sem ætlað er börnum. Allar upplýsingar eru þó ópersónugreinanlegar og tímabundnar.  

Síðast uppfært 4. september 2020