RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Kosningaumfjöllun RÚV

Mynd með færslu
 Mynd: Rúv
Undirbúningur fyrir umfjöllun RÚV fyrir alþingiskosningarnar 2021 er hafinn. Umfjöllunin verður á sérstökum kosningavef, í sjónvarpi, útvarpi og hlaðvarpi. Kosningaumfjöllun RÚV hefst 31. ágúst með leiðtogaumræðum í sjónvarpssal.

Hér eru helstu áherslur í kosningaumfjöllun RÚV.

Kosningaumfjöllunin verður sem hér segir:

  • Kosningavefur RÚV opnaður í byrjun september.
  • Tveir umræðuþættir í sjónvarpi með leiðtogum stjórnmálaflokka, 31. ágúst og 24. september.
  • Forystusætið – ítarleg sjónvarpsviðtöl við formenn stjórnmálaflokka.
  • Kjördæmafundir í útvarpi með oddvitum allra framboða, síðustu þrjár vikur fyrir kosningar.
  • Málefnaumræða í útvarpi í ýmsum þáttum á Rás 1 og 2.
  • Kosningahlaðvarp RÚV þar sem fjallað verður um kosningamálin, rætt við frambjóðendur, sérfræðinga, kjósendur og álitsgjafa.
  • Fréttaskýringar í sjónvarpsfréttum um kosningamálin.
  • Fræðslu- og skemmtiþættir í sjónvarpinu og á rúv.is fyrir yngri kjósendur.
  • Kosningaumfjöllun á samfélagsmiðlum RÚV.
  • Kosningavaka í sjónvarpi að kvöldi kjördags, 25. september og kosningavakt á Rás 2.
  • Leiðtogar flokka sem ná kjöri á Alþingi mætast í Silfrinu daginn eftir kjördag.

RÚV býður framboðum auk þess frían útsendingartíma í sjónvarpi fyrir kynningarefni um stefnumál sín. Þetta er gert í samræmi við 7. tölulið 2. mgr. 3.gr. laga um Ríkisútvarpið nr. 23/2013. RÚV birtir reglur þar að lútandi. Kynningarefnið verður sýnt síðustu tvær vikur fyrir kosningar og verður dregið um í hvaða röð það verður sent út. Kynningarefnið þarf að vera tilbúið og því skilað til RÚV eigi síðar en 10. september sbr. reglur um kynningarefnið sem þegar hafa verið sendar framboðum.

RÚV mun kynna öll gild framboð í tveimur leiðtogaþáttum, með viðtölum við formenn (Forystusætið), í kjördæmaþáttum og með því að sýna kynningarefni þeirra.

Stefnt er að því að formleg kosningaumfjöllun hefjist með leiðtogaumræðum í sjónvarpinu þriðjudaginn 31. ágúst. Flokkum sem kynnt hafa framboðslista í amk. einu kjördæmi og hafa fengið listabókstaf er boðið að taka þátt í þeim. Viðtöl við formenn flokkanna í Forystusætinu hefjast mánudaginn 6. september. Sömu viðmið gilda um þátttöku í Forystusætinu, að flokkur hafi kynnt framboðslista í amk. einu kjördæmi og hafi fengið listabókstaf. Þá er ráðgert að formleg málefnaumfjöllun í fréttum, útvarpsþáttum og hlaðvarpi hefjist í byrjun september. Kjördæmafundir í útvarpi hefjast í fyrstu viku september og er skilyrði fyrir þátttöku að flokkur hafi kynnt framboðslista í viðkomandi kjördæmi. Gert er ráð fyrir að leiðtogar flokka mætist í sjónvarpssal kvöldið fyrir kjördag, þann 24. september.

Fjallað verður um framboðin og kosningarnar í fréttatímum RÚV. Gætt verður að því að gera framboðum jafn hátt undir höfði en fréttamat gildir hverju sinni. Um aðgang framboða að fréttum RÚV gilda reglur um takmarkanir á þátttöku framboða til almennra kosninga í dagskrá RÚV. Þar segir m.a. að fréttastofa og aðrar dagskrárdeildir skuli forðast að leiða frambjóðendur fram í fréttum, fréttatengdum þáttum eða annars staðar í dagskrá eftir að framboðsfrestur rennur út og þar til kosningar eru um garð gengnar, nema sterk rök mæli með nauðsyn þess að viðkomandi komi fram eða til viðkomandi sé vitnað vegna sérstakra atvika. Þetta á þó ekki við þegar um er að ræða sérstaka dagskrár- eða fréttapistla sem samþykktir hafa verið í tilefni af kosningaundirbúningi.

Ríkisútvarpið áskilur sér rétt til að takmarka þann fjölda framboða sem mætast hverju sinni í viðtals- eða umræðuþáttum líkt og gert hefur verið í undanförnum alþingiskosningum, forsetakosningum og sveitarstjórnarkosningum. Nánari útfærsla á leiðtogaumræðum kvöldið fyrir kjördag verður kynnt þegar fjöldi framboða liggur fyrir. Markmiðið með þessu er að stuðla að upplýstri umræðu í aðdraganda kosninga og skila áhorfendum meiru en umræður allra framboða á sama tíma í umræðuþætti myndu gera. Með þessari framkvæmd er meðal annars brugðist við ábendingum sem koma fram í skýrslu Öryggis- og samvinnustofnunar Evrópu (ÖSE) um framkvæmd alþingiskosninganna 2013. Í skýrslunni kemur m.a. fram að frambjóðendur og áhorfendur töldu að skort hefði á dýptina í umræðuþáttum með of mörgum þátttakendum. Hér má finna skýrslu ÖSE frá 2013: http://www.osce.org/is/odihr/elections/iceland/103314?download=true

Nákvæmari útfærsla og tímasetningar birtar þegar nær dregur.  Vakni spurningar er hægt að hafa samband við Valgeir Örn Ragnarsson kosningaritstjóra í tölvupósti,[email protected], og verður þeim svarað við fyrsta tækifæri.