Thomas Borgen, fyrrverandi bankastjóri Danske Bank. Mynd: EPA-EFE - Ritzau-Scanpix
Athugið þessi frétt er meira en 4 ára gömul.
Yfirmenn Danske Bank grunaðir um peningaþvætti
Thomas Borgen, fyrrverandi bankastjóri Danske Bank, var í gær ákærður fyrir að hafa átt aðild að peningaþvætti sem stundað var á árum áður í útibúi bankans í Tallinn í Eistlandi. Að sögn danskra fjölmiðla var húsleit gerð heima hjá honum vegna rannsóknar á fjármálamisferlinu.
Þá var greint frá því í dag að lögregla hefði leitað sönnunargagna heima hjá tíu fyrrvernadi yfirmönnum í bankanum. Þeir eiga ákærur yfir höfði sér.
Talið er að um sex þúsund viðskiptavinir Danske Bank í Eistlandi tengist peningaþvættinu. Misferlið var framið á árunum 2007 til 2015. Jafnvirði 28 þúsund milljarða króna fór gegnum útibúið í Tallinn á þessu tímabili. Líklegt þykir að stór hluti þess fjár tengist peningaþvætti.
Fyrr á þessu ári skipaði fjármálaeftirlitið í Eistlandi Danske Bank að loka útibúinu þar í landi. Stjórnendur bankans fengu átta mánaða frest til að ganga frá lokuninni.
