Mynd: epa
Athugið þessi frétt er meira en 2 ára gömul.
Yfir 1.000 hafa dáið í ebólufaraldri í Kongó
Yfir 1.000 manns hafa nú dáið af völdum ebólusýkingar í faraldri sem hefur geisað í Lýðstjórnarlýðveldinu Kongó síðan í ágúst í fyrra. Heilbrigðisyfirvöld í Kinshasa tilkynntu þetta í gær. Í tilkynningu heilbrigðisráðuneytisins segir að borist hafi fregnir af 14 dauðsföllum af völdum ebólu á síðustu dögum og þar með sé staðfestur fjöldi látinna orðinn 1.008. Yfir 1.450 smit hafa verið staðfest, þar af 126 í síðustu viku.
Aldrei áður hafa svo mörg smit verið staðfest á svo skömmum tíma í þessum faraldri, sem er sá næst-mannskæðasti frá upphafi.
Talskona heilbrigðisráðuneytisins, Jessica Ilunga, segir að einkum megi rekja þessa miklu fjölgun til hins ótrygga ástands sem ríkir í landinu, en ítrekað hefur verið ráðist á starfsfólk Sameinuðu þjóðanna, Rauða krossins og heilbrigðisyfirvalda sem freista þess að hamla gegn útbreiðslu sóttarinnar með bólusetningum og öðrum smitvörnum. Mikið og útbreitt vantraust ríki hvort tveggja í garð yfirvalda og bólusetninga á þeim svæðum sem sóttin herjar sem harðast á.
